已進佔街機2D格鬥第一位嘅《GuiltyGear》（GG），打入PS2後今勻連PSP版都撈埋，唔單止4.3"闊屏打得過癮，新版《GGJudgment》仲加多樣類似《FinalFight》嘅邊行邊打過關模式，就算放下敵意唔隻抽，都可拍吓檔合作「掃街」過關！
文、攝：陳福榮
假如有人同你講，話《GuiltyGear》（下簡GG）係𠵱家最In嘅格鬥遊戲，你千祈咪懶醒笑人儍仔，事關喺日本《拳皇》同《街霸》早就Out咗，論2D格鬥《GGSlash》至係一哥，受重視程度拍得住國民級《VirtuaFighter》！無他嘅，佢系統可互補平衡度嘅不足，畫面又靚絕非粗到嚇死人嘅「點點畫」，所以呢幾年吸納咗勁多信徒，喺本港嘅支持度亦不斷增加。今次《GGJ》賣大包，除咗適合手提機周街玩嘅Judgment模式外，更足本收錄推出咗無耐嘅PS2版《GGXXSlash》，一Game價錢兩種享受，論抵玩算係PSP之冠！
儲齊人物不斷打
《GGJ》最大賣點，當然係橫向動作玩法嘅「Judgment」，但留意鑑於處理上點都同格鬥玩法有啲分別，每位角色只會Cut剩幾招，而且增設咗個跳掣，玩時需要啲時間去適應。開始時僅得5人可用，其他角色會喺攻略途中遇上，繼而成為追加人物，換言之想儲齊所有人就要不斷打，相當襟玩。而每關之間嘅讀碟時間都算幾快，絕對唔會令人瞌眼瞓。
話晒都係PSP遊戲，盡可能嘅話都想佢對應通訊模式啦！而《GGJ》兩大模式都支援網絡連線，等玩家唔使餐餐都食自己咁寡。只要開着咗Wi-Fi，進入「Judgment」或者「Slash」都可以喺Network模式度準備應戰。經測試後窒機情況唔算嚴重，尤其係「Judgment」玩法完全發揮到合作精神，成班人網聚時雙打夠熱鬧。
移植度近百分百
至於「Slash」玩法則係足本移植之前嘅PS2版《GGXXSlash》，不論畫面質素、流暢度、音效都似足PS2及街機版，如果未買家用版就可以直接玩PSP算數！當然你要忍受出昇出超必唔多順手嘅操控性。除咗重視故事嘅街機模式，佢仲有挑戰個人實力極限嘅生存模式，同埋要大家動腦筋點樣過關嘅任務模式等等，由於好多隱藏要素都係喺生存模式打返嚟，想儲齊所有角色嘅特別顏色與舊版特性，就要花啲時間喺呢度喇。雖然入Game前讀碟都要成十幾秒，不過當睇到標題畫面後，讀碟即時大有改善，快到令人以為自己係玩緊PS2㖭！
後樓梯
偷懶報告
PSP呢款《GGJ》強調連線對戰同合作過關，最啱做嘢做到悶悶哋，約埋「三五蛇王知己」匿喺後樓梯打餐飽！
手掣難出招
覺得喺「Slash」較難出招，都係手掣嘅死症問題，而「Judgment」就爽快啲，奈何敵人攻擊方式幾一致下，玩得耐會覺得單調。好在同街機冇乜分別，顏色仲似到十足十。
新仔易上手
幾好吖，校最低難度都可以過到幾關，至啱我呢亭初學者。連招好易出，係咁㩒啲掣就出到招，唔使記好多嘢，呢樣幾好。畫面好Sharp好卡通Feel。
讀碟快咗
𠵱家啲PSP遊戲咁貴，如果玩兩嘢爆機就好唔抵，好彩佢有兩種完全唔同風格嘅玩法，唔計格鬥，齋玩橫向動作過關都好襟玩。讀碟比想像中快，可能廠商技術進步咗，抵讚！
唔使買PS2版
之前PSP都出咗隻《GGXX#Reload》，今集有齊兩種玩法真係幾抵。至於「Slash」就最啱冇買PS2版嘅人隨時練功之用，最正係所有隱藏要素都同家用版一樣。
PROFILE
遊戲類型：動作格鬥
對應機種：PSP
遊玩人數：1至2人
開發廠商：ArcSystemWorks/Sega
行貨售價：$288
