就快9月，黃油蟹去到水尾，大閘蟹又未當造，輪到藍蟹、泥蟹、阿拉斯加蟹、雪蟹同軟殼蟹當殃。無計喎，包括我在內嘅一眾蟹迷唔停得口，各位蟹大哥注定無路可逃嘞，放低兵器投降，自動自覺斬晒啲手手腳腳出嚟喇，呢餐我喫梗你哋呀！
記者：黃若茵 攝影：林栢鈞
重量級蟹腳配加拿大牛柳$248
傳統海鮮牛扒餐多數係龍蝦配牛柳，Albert嫌太過沉悶：「我改用阿拉斯加蟹蟹腳，大大隻感覺實在啲，牛柳夠腍身，兩者味道同口感都好夾。」
香味原隻烚凍蟹$90
泥蟹常見於澳洲昆士蘭同新南威爾斯兩州交界嘅紅樹林同河口，棲息於鹽度較低嘅泥濘沼澤地帶。Albert話：「凍食，主要食泥蟹香濃鮮味，我加沙律菜突顯肉味，點檸檬汁沙律醬，仲正。」
香茜牛油焗雪蟹腳$188
雪蟹產自太平洋一帶，新疆、韓國、俄羅斯都有，肉質雪白細嫩。Albert話：「雪蟹鮮得嚟味道比較淡，所以我加牛油同香茜煮焗，會香口啲。雪蟹多殼，淨食腳就無咁麻煩喇。」
珍寶蟹肉幼條麵$158
阿拉斯加蟹又稱帝皇蟹，日本人稱鱈場蟹，產地於太平洋北部寒冷海區，體形龐大可重達10磅。Albert話：「蟹肉大件唔在講，幼麵嘅Sauce我用咗白酒忌廉去煮，鮮蟹肉夠多，食落就啖啖都咁Rich。」
鮮味烚蟹餅$88
藍蟹原產美洲，西印度洋、新西蘭北部、地中海東部嘅泥地、沙地都搵到藍蟹足迹。Albert話：「藍蟹肉質夠結實，做出嚟嘅蟹餅唔會咁易散，我加蒜粒同薯茸一齊煎，點少少醬辣辣哋仲好味。」
睇埋裝修
Shack=美式海鮮餐廳
公關Hiram先解釋餐廳名「Stormies'CrabShack」：「『Shack』係啲食Casualdining嘅餐廳，美國東岸碼頭最多呢類餐廳，外形似一間間屋仔咁，主要食新鮮運到嘅海鮮。」餐廳從前叫「Stormies'Weather」，𠵱家改得店名多咗個「Crab」字，海鮮當然唔少得，「今個夏天餐廳重新定位，決定做多啲海鮮，主打美洲NewEngland海峽特色海鮮，主角係蟹，咁當然一般三文治、甜品、扒類我哋都會供應。」餐廳位於蘭桂坊，所以地下一層都整番個酒吧，一樓則以餐廳形式經營，食飯飲酒一站式搞掂晒，食飽蟹，同朋友飲番兩杯吹吓水好唔錯。
食蟹最緊要方便
大廚Albert話：「食物方面，我哋用美洲特色做法，即係簡單煮法同調味帶出海鮮味道，因為NewEngland海峽水質好，海鮮夠鮮，做法愈簡單愈能夠帶出原汁原味。」本身都係蟹迷嘅佢話：「我都好鍾意喫蟹㗎，不過有時都會嫌剝殼麻煩，所以我諗菜式嗰陣都會考慮埋呢個問題，希望客人食嘅時候方便啲。」完全講中我心聲，我就最怕剝殼㗎喇，每次都要人幫我剝埋殼先肯食蟹，今次見師傅做嘅菜式，差唔多全部都唔使自己落手落腳剝殼，就連一味原隻凍蟹，都好細心咁預先斬件，啱晒我呢種懶人啦。
蟹種類多各有食法
全球有超過5,000種蟹，歐洲同美洲沿海水域產量最多。蟹可以肉蟹同膏蟹分類；亦可以淡水或海水分類，前者代表就係大閘蟹，後者代表有又名帝皇蟹嘅阿拉斯加蟹，近年愈嚟愈多香港人鍾意食阿拉斯加蟹，因為貪佢夠大隻啖啖肉。
大西洋沿岸以藍蟹、石蟹及岩蟹最有名，西式食法多數係白烚後冰鎮，點啲Cocktailsauce、忌廉汁嚟食最滋味。蟹類喺完全成熟前會換幾次殼，泰國、越南人就鍾意食喺仲春到仲秋之間剛換殼嘅蟹，剛換殼嘅蟹就係呢幾年香港人經常食嘅軟殼蟹，呢啲新鮮小蟹，幾乎每個部位都可以食㗎。
搵食攻略
Stormies'CrabShack（28455533）
地址：中環蘭桂坊德己立街46號地下及1樓
營業時間：星期日至四11:30am-2:00am，星期五、六11:30am-3:00am
交通：中環地鐵站D2出口
座位：75個，有吧枱
人均消費：午市$130，晚市$250
有着數：以恒生卡簽賬最多可獲7折
最好賣：阿拉斯加蟹腳，日賣50份