日本妹的確特別Cutie，約前原早苗介紹日本餐廳，佢即刻眨一眨眼，帶住溫柔微笑，以唔鹹唔淡嘅廣東話講句：「無問題！」話晒佢喺香港住咗3年，份人又為食，叫佢介紹日本餐廳實無搵錯人。「味十味」位置都幾偏僻，喺TimesSquare後面一條橫街，唔係得佢帶路，都唔使旨意識得摸上門，早苗話：「呢度食法式日本菜，價錢雖然比一般日本餐廳貴少少，但每個月我起碼嚟一次，鍾意食呢度啲乜？所有嘢！覺得最正嘅係煎雞飯，味道同我媽咪整嘅一樣，我好懷念啊。」
懷念？梗係啦，早苗為跟住喺香港嘅男友一齊，3年前毅然搬嚟香港，為食嘅佢初來甫到唔識搵食，「香港係好多日本餐廳，但啲師傅根本就做唔到正宗口味。喺日本，大廚起碼要有30年入廚經驗先叫專業㗎；但喺香港，都無正規『職業訓練所』訓練日本菜廚師，咁又點會做到我哋嘅口味呢。」嘩，30年，真係幾難喎，好彩「味十味」老闆娘兼大廚井上惠子由細到大煮嘢食，佢話：「我希望喺香港做到啱日本人口味嘅日本菜，呢度90%客都係日本人，𠵱家慢慢多咗香港人幫襯。」訪問完畢咁啱到午膳時間，見餐廳清一色坐滿日本人，睇嚟惠子出品真係深得同鄉歡心。
記者：黃若茵
鳴謝：JETROHK，櫪木縣香港事務所
（上）大阪和風豬肉丸
芝士雞肉棒 各每串$20
惠子：「我係大阪人，肉丸、雞棒呢類小食喺大阪隨處可見，好有地道風味㗎。」豬肉丸大大粒，入口鬆軟；雞肉棒燒得好香口，加芝士好正。
番茄紅酒煮火腿$80
惠子：「番茄用紅酒同香草醃足1晚，用巴馬火腿包住上碟。」醃過夜唔怪得咁入味，番茄好新鮮好Juicy，絕對食到原汁原味。
燒牛肉沙律$120
早苗：「我第一次食就愛上呢個沙律喇，我啲同事甚至瘋狂到要搭的士嚟外賣一份返屋企食。啲牛肉夾埋芝士一齊食，口感好豐富，份量好啱女仔食㗎。」
味十味（28360671）
地址：銅鑼灣登龍街28號永光中心7樓