陳四萬每次行出嚟都威風凜凜，表面睇真係冇嘢難到佢，查實佢都唔係萬能，同好多學生一樣，考試都試過肥佬。陳太接受《明報月刊》訪問時就講到，當年家境貧困，自己希望用一年時間讀完預科，早啲入大學，但因為母校聖心書院唔可以兩年預科當一年計，咁佢就轉去聖保祿中學，可惜生物科肥佬，第一次考大學失敗而回。
但以陳太咁硬淨嘅性格，又點會就咁放棄？後嚟佢喺瑪麗醫院一邊做文員，一邊自修生物，結果一年後就考入大學。佢仲試過同妹妹方寧生一齊供大佬方曼生讀書，真係顧家。
雖然位高權重，但陳太畢竟都係一個家庭主婦，佢話屋企嘅家頭細務，一路都係由自己打理，就算請客點咩餸，都係由佢發辦，佢話咁先叫傳統喎。女人，真係唔易做。