沉寂咗好一段時間嘅IPO，最近終於有番啲新氣象，「波衫王」永嘉（3322）今日截孖展，集資6億至7億，下周三掛牌。
永嘉業務最主要一瓣係以OEM方式（即係由品牌商授權，一手包辦造衫兼貼嘜頭，最後交番畀品牌商銷售）製造運動服裝，手上大客有Adidas、Reebok、Umbro及Diadora等。做OEM競爭大，你唔做大把人爭住做，所以profitmargin難免偏低，加上行內唔興簽長期銷售合約，理論上個客可以隨時中止雙方嘅合作關係。雖然話永嘉同Adidas合作咗25年，過去3年營業額更有超過四成來自Adidas，不過雙方始終冇長期銷售合約，如果Adidas因唔知乜嘢原因cut單，咁永嘉收入就會即時凍過水。
招股書又講，永嘉同英國Umbro簽咗協議，未來4年幾喺大陸同本港獨家代理Umbro嘅所有產品。事實上，Umbro近年已經風光不再，英超一哥車路士早排竟然嫌棄Umbro個朵唔夠勁，寧願賠錢解約唔用國貨，轉而幫襯德國牌子Adidas。永嘉除咗要每季畀專營權費Umbro外，另一個附帶條件係唔可以代理其他牌子嘅體育用品，咁即係話未來4年幾都咪使旨意代理到其他勁牌子（如Nike及Puma等）嘅體育用品，咁試問又點會賺到大錢？（雖然畀佢爭都未必爭到。）
此外，招股書標榜同另一間公司合作，共同獲得四大球會（巴塞隆拿、祖雲達斯、曼聯及巴黎聖日耳門）產品喺大中華地區嘅獨家分銷權，除巴塞外，祖記因打假波被罰降落乙組，仲要俾人扣成10幾分，前景堪憂；曼聯過去3年已與聯賽錦標絕緣；至於聖日耳門，狀態就更加低沉，不值一提。
查實所謂四大球會產品嘅「大中華地區獨家分銷權」，最令人憧憬嘅莫過於大陸，可惜內地偏偏老翻問題嚴重，冒牌波衫隨處皆是，假冒質素高到同真嘅差唔多，旨望神州發夢冇咁早。咁都不特止，呢個獨家分銷權有效期只係去到2008年，之後係點冇人知。
其實，思哲想奉勸永嘉管理層一句，零售同做廠畢竟係兩種截然不同嘅生意。做開廠，你哋可能見人家做零售似好好賺，但其實你哋嘅corecompetence仍然係生產，如果以為上市後用兩三億就搞到全國性專賣銷售連鎖，八千幾萬就可以將零售點由800間增加至1500間，似乎太睇少中國嘅地大「勿博」，都係專心做番本業啦！
數碼通上5萬客使1.6億
數碼通昨日公布業績，佢嘅命運，跟其他網絡商一樣，又係盈利插水。06年純利8,388萬，較05年3.3億，減少75%。公司少賺2億幾，全因淨係補貼3G手機，已經使咗1.6億。
大家估吓，以1.6億送手機，多咗幾多人上數碼通？答案係52,000人。咁上客成本，每人平均咪要3077元？以ARPU213元計，頭14個月的月費，只夠補貼手機嘅錢，仲未計其他經營成本。如果客人唔夠一年走佬，公司咪連部手機都蝕埋？試問盈利又點會唔急跌。當然，數碼通一定會迫客仔簽約，然後利用合約期嘅時間，交叉銷售其他更貴嘅服務。
數碼通的其中一個3G「法寶」，HSDPA（高速下傳分組接入），頻寬1.8Mbps，用戶透過筆記簿電腦上網，不過平均月費差不多要500元，仲未計逾2千蚊嘅硬件，而且只受數碼通客玩，其他流動網絡商客戶免問。目前，100Mbps住宅寬頻200元唔使，HSDPA這個價錢，思哲完全看不到普及嘅可能性。至於另外一些流動電郵、漫遊等服務，看樣子也不是甚麼賺大錢的東西。
現時，數碼通嘅3G客戶，有160,000人，佔客戶總人數15%，佔月費計劃客戶20%。流動網絡商還要向固網支付互連費，而且向固網商租線亦不便宜。貼咁多錢上客，唔通3G真係咁唔吸引？噚日思哲寫FON革命，今日收到讀者來信，畀咗唔少寶貴意見，喺度乘機講吓。
思哲認為，管他3G、Wi-Fi還是Wi-Max，總之可以幫用家傳遞到訊息嘅，消費者就幫襯。用家需要的是application，而不是網絡技術。更重要是，網絡嘅「開放性」，絕對影響killerapplication會否出現。它不是網絡商隨便買個新聞台的報道，或者下載甚麼MP3鈴聲，而是能夠與互聯網接軌的可能性。
例如，今天雖有BT、YouTube，但大家都不知道，明天誰會登上互聯網這個舞台。「密封式」的3G與FON，前者恍如開電視台，只讓自己簽的幾位演員表演；而後者，則把頻道開放，畀任何有興趣者演出。無疑，後者的收視一定較高。
所以，思哲覺得，網絡商的責任，在於做好網絡，而不是VAS（增值服務）。現時，網上行的確做了不少VAS，不過佢哋唔係所有VAS都賺錢，思哲以now.com.hk為例，該網站內容豐富，背後由一隊人營運，這樣的成本及人手，已經可以搞間雜誌社，但網站竟然一個廣告banner也沒有。明顯，管理層知道，這種生意根本無錢賺。搞咁多嘢，只係想幫公司留客，轉個角度，即係慳番賣廣告嘅錢。
尹思哲
[email protected]