有線娛樂新聞台女主播鄭文入行三年，日前她穿低胸裝拍照時透露訪問過不少靚仔明星，梁朝偉和王力宏更讓她一見難忘，因為兩位靚仔都向她發出十萬伏特電力，當場令她發呆，連要訪問甚麼都不記得。
有線主持鄭文是娛樂新聞台的第一代主播，入行三年，訪問過不少名人紅星，跟她最有緣的竟然是成龍，她日前接受訪問時說：「我記得初初入行第一個就係訪問成龍，第一次出trip又係成龍搞，第一次做專訪都係做成龍。呢三年嚟，我做成龍訪問最多，可以話係最有緣。」
想訪問王菲
不過鄭文最想訪問的則是已經再婚生女的王菲，她說：「入行前，王菲已經係我偶像，我都好想訪問佢，同埋我一直都未見過佢，好想見佢真人，不過我諗𠵱家機會都好微。」
鄭文訪問過不少俊男美女，所謂異性相吸，始終都是俊男令她留下較深印象，她說：「試過訪問幾個電眼俊男，好似偉仔（梁朝偉）咁，有一次望住佢，之後就唔記得咗問乜嘢，成個人呆咗，佢又望住我唔講嘢，真係俾佢電暈咗，傳聞中電眼係真，真係有電。除咗偉仔，王力宏電力都好勁，我都試過俾佢電暈。」
最愛煲韓劇
最近韓風襲港，無論劇集、電影還是藝人都深受香港人歡迎，故有線推出《韓風娛樂一周》為觀眾提供更多韓國娛樂新聞，鄭文就是主持人之一，她說：「做呢個節目前，我已經鍾意睇韓劇，到𠵱家都係一放工有時間就煲，之前我就因為鍾意睇韓劇，所以去學韓文，有機會想訪問韓星李準基，想見吓佢係咪咁靚仔。」
採訪：楊潔雯 攝影：陳志嵐
