老媽子常自豪慳家有道，舊時買返學鞋給我總是買大一兩個碼，黑皮鞋加對白飯魚搞掂。點知佢睇完醫生，才發現自己常常腰痠背痛，原來是因為對鞋，緊張起來，四圍打聽，才知道原來鞋對小童骨骼成長更重要，尤其有扁平足、O形腳、X形腳之類，唔會因為名牌就一定掂。老媽子終於知錯，為免一錯再錯，命我尋找專家，為下一代，好好認識如何買學童鞋。接旨！
記者﹕馮敏兒 攝影﹕陳盛臣
模特兒﹕Noddy、Cat
遺傳了我的扁平足的一對仔女，早已買了多對所謂矯形健康鞋，滿以為安枕無憂，但當我遇上足科矯形師吳燕玲後，才發現自己原來連買鞋都未識買，更遑論甚麼叫矯形鞋！
過你幾招師奶變專家
使橫手 又屈又㩒
1.鞋頭好易屈：輕輕屈曲鞋頭，如果曲位配合前掌，亦柔軟易屈，那對鞋就會穿得舒服。
2.搖來搖去企唔穩：把鞋搖動，好像搖艇般擺動，看它有幾快停，如果佢搖好久都未停，就表示着佢會行唔穩！
3.扭來扭去有幾堅：扭鞋腰，測試鞋中底板是否堅硬，那是保護和承托力的重心。扭成咁！即係廢嘅！
4.反轉鞋底夾腳形：反轉鞋底對照小朋友的腳形，夾一夾鞋頭應該是方形還是斜形。
眼甘甘 度來度去
5.後跟杯要夠堅：按鞋踭位的後跟杯，看它是否夠堅硬，否則就連最基本的保護腳踝都做唔到！
6.鞋頭要度高：對照小朋友腳趾公的位置，為免影響生長，要有足夠的空間給他伸展。
7.赤腳踩鞋墊：把鞋墊褪出來，赤腳踏地測試，腳踭尾對齊，前面應有1cm或一隻手指的空位；若腳趾尾拋了出去，就唔啱喇！
8.鞋領口要留位：鞋領口管着腳形，保護承托，要檢查硬度和虛位。
9.下圍不可大過上圍：鞋踭底不要闊過鞋踭上圍，雖然好像更穩，但反會造成外踝太早落地，弄傷膝蓋。
着上腳 行行企企
10.鞋楦各有不同：由於每隻牌子的鞋楦都不同，設計不可能適合任何人，如女仔太肥，穿後啲肉唧晒出來，就表示太窄；男孩太瘦，鞋面留有大把空位都係唔啱！
11.楔得1隻手指位：須在未綁鞋帶，腳掌推到最前時留有一隻手指位才對。綁鞋帶時則要把腳推至貼踝，不留虛位。
12.鞋踭咪上上落落：讓小朋友向前步行，從後觀察鞋踭有否上上落落；對鞋太硬，腳要屈但鞋唔屈，就會拖到腳踝被刮損！
13.鞋帶叠埋着襪補救：綁鞋帶時如果摺叠在一起，表示太多隙縫，不過有時穿對厚襪可補救。綁完鞋帶後爆開，那他的腳就太肥。
14.腳掌滑動會起枕：再輕按鞋身，檢查鞋內空間虛位，太鬆就會令腳掌在鞋內滑動，可能會擦黑起枕。
6大謬誤咪一錯再錯
1.唔好貪大！不要為想慳而買大兩個碼，因鞋骨只有一個位，太大的鞋會令腳滑前撞傷。
2.鞋帶勝魔術貼！綁帶鞋調校能力最高，不懂綁鞋帶的小朋友，可以買擁有兩條魔術貼的鞋，前後可以調校。
3.行路不可頂「頭皮」！何謂頂趾？不是頂腳趾叫痛才是頂趾，而是行路時開始觸到鞋頭皮，就表示開始唔啱。或可拿鞋墊出來驗腳趾印，如果趾印去到盡頭亦是頂趾的證明。
4.4歲始一年換一對！中文大學剛有研究，約1歲大的BB，腳的生長最快，2、3歲時半年就要換鞋，4-7歲時1年換1對。女仔直至11、12歲時開始減慢生長速度，男仔則12、13歲。
5.有足弓位未必是矯形鞋！家長常誤解，以為穿了有足弓位的就是矯形鞋，其實足弓位亦要配合腳踝斜度才能矯正腳部斜度，保護骨骼發育。這時候你應該進行一次詳盡檢查，有需要就得趁小朋友在6、7歲骨骼鈣化定形前，為他訂做一對矯形鞋墊。
6.膠水礙透氣！真皮的透氣性最好，但有時裏面有層膠水就一樣會防礙透氣，一般運動鞋都是PU皮，上層是膠，下層是平價的皮，透氣度當然不太好，但也有些透氣物料如GORE-TEX。
邊度搵專家？
1.足科矯形有限公司
全面檢查$200(約需半小時)
矯形鞋墊第1套$1,280、第2套至12歲前每套$800
查詢：23329375
網址：www.ezped.com
2.Dr.Kong足科保健中心
詳細檢查$180
兒童矯形鞋墊第1對$650、第2對$450
查詢：23344032
網址：www.dr-kong.footcare.com.hk
健康鞋
