各位中環友，雖然長江股價跌，但長江中心噚日「牛氣」衝天，事關有26隻彩牛棟篤企喺大廈外。唔好睇小呢啲牛，佢哋大有來頭，背後支持嘅除咗歐盟呢個咁有份量嘅外國勢力之外，超人李嘉誠都當佢哋係貴賓，唔係又點會肯借出集團總部，畀班牛做棲身之所！
話說呢26隻牛，分別代表咗26個歐盟成員國，以及歐盟委員會，所以每隻彩牛都有自己嘅特色，好似荷蘭嗰隻就用咗鬱金香做裝飾。贊助嘅Rabobank話，今次中國之旅，去勻上海、北京、瀋陽及香港，一早計劃好香港做壓軸尾站，後來先知10月上海又另有盛會，所以香港之後，會返去上海做多場show先返歸。
想睇吓呢班超人嘅貴客，下個月9號前就可以去長江中心，唔得閒想遲啲睇？都得，12至27號走去維園，都仲趕得切見佢哋一面。
曾顯華攝