阿兒表示，雖然她是獨生女，但其實她尚有一個「妹妹」Bebe，這頭8歲大的西施犬，就是亡父的心頭愛。她稱，於8年前因緣際會，在獸醫診所收養了遭人棄養的Bebe後，竟為亡父締結了另一段父女緣。「爸爸在生時，佢哋兩個食、瞓、行都一齊，真係形影不離㗎。」
她紅着眼睛表示，父親很疼愛Bebe，於臨終前買下很多狗糧，並叮囑阿兒要定時餵飼，不要讓Bebe肚餓。「我就係知道爸爸臨終前最想見到Bebe，所以嗰時用個袋袋住Bebe，靜靜雞帶佢入院，到咗再拉埋布簾，等佢哋可以見多一次。好彩Bebe不嬲都好靜，唔會吠唔會出聲，咁我先可以完成爸爸臨終前見Bebe嘅心願。」
阿兒稱，亡父走後，Bebe終日鬱鬱寡歡，經常伏於大門前等待父親回來。父親去世至今半個月，Bebe亦瘦了一圈。「Bebe呢排唔係瞓喺大門口前，就係瞓喺爸爸張床上，好有性咁等佢返來。其實唔止Bebe一個想佢返嚟，我同媽咪都好想佢可以返嚟。」