顧問S早上返到公司，只見平日負責開門嘅辦公室助理M嬸企喺門口，呆呆地，要等顧問S親自開門，開燈。顧問S問M嬸：「究竟搞乜鬼？」M嬸話：「唔見咗條辦公室門匙！」顧問S聞言，立即更換大門嘅密碼，因為開門需要啓動密碼，再加鎖匙。
隔咗兩日，顧問S見到M嬸仲係好冇癮咁嘅款，於是問清楚啲，M嬸和盤托出：「前幾日與一位朋友去行街，入咗黃埔花園吉之島嘅超市，推住架購物車，一時貪方便，將個手袋放在購物車上面，同啲貨物放埋一齊。行行吓，朋友講一聲：你睇吓呢樽洗頭水，幾靚噃，我轉頭一望，望咗唔夠十零秒。再推車向前行，唉吔，手袋已經唔見咗。立即搵保安員，保安員一片無奈之色，佢話呢啲事唔係第一次發生喎，唯有報警啦，邊度會搵得返吖。」M嬸唔見晒啲證件、門匙，最心痛嘅係內有現金，夠佢一個月飯餸錢。奉勸啲女士行超市，孭實個手袋先至好。
靚女V自泰國返嚟，有唔同故事版本。佢哋成班人在曼谷spa玩到癲，食到癲，最唔滿意嗰餐竟然係在香格里拉香宮內飲茶食翅及燕窩，話翅與燕窩質素完全不可接受，要聲討推薦人──左丁山是也！聲討完畢，靚女V話幾位團友之中，Y小姐到中央洋行（CentralChidlom）購物，畀錢之後，掛住攞一包二包戰利品，手袋放在收銀員櫃台，唔記得拎。搭高鐵返回半島酒店途中，先至發覺，Y小姐話：「死咯，實會俾人攞咗去，入面有幾張信用卡，點算好？」於是用手機Call半島酒店，請佢哋幫忙通知Central，再打電話截卡，打完晒電話，已經返到半島，前枱人員話畀Y小姐聽，Central已經搵到佢個手袋，會送返半島。靚女V話：「你睇吓泰國人幾老實！」其實兩者有分別嘅，M嬸喺黃埔吉之島失咗手袋，乃有心賊裝冇心人；Y小姐在曼谷Central唔見手袋，乃有心人（可能係收銀員）暫時代管，不能就此推論香港人比泰國人唔老實。