周星馳𠵱家喺寧波拍緊新戲《長江7號》，呢幾日都係拍緊學校嘅主景，為咗保密造型，星爺防偷拍功夫做得好足，前日舉行開鏡儀式後，就密封咗拍攝場地，狗仔隊就連星爺嘅蹤影都見唔到。
同新女分頭搵食
原來學校同星輝公司簽咗份好嚴格嘅聲明，如果有一個記者入到拍攝場地，學校就要負責任，所以只准有證件嘅人員入去。
前晚七點收工後，星爺同林子聰（肥仔聰）又坐車去咗兩間酒樓睇景，之後再去德勝麵館醫肚，星爺對食一向冇乜要求，所以當晚佢只係好簡單咁叫咗個過橋蝦爆鱔，佢好快咁食完碗麵後，同肥仔聰幾個人係咁吹水，星爺講到手舞足蹈，唔知講乜令佢咁興奮。呢幾日唔知係咪因為有傳媒跟住佢，所以唔見佢同公司新女張雨綺見面。
