彭氏兄弟對上一次《見鬼10》玩過驚嚇溝搞笑後，新作仍然不甘於走回《見鬼》齋嚇方程式，《鬼域》就極力擺脫恐怖氣氛，以超強CG帶出一個被遺忘世界，當中包括大家遺忘已久嘅親人，甚至連拆咗嘅九龍城寨、荔園等都會喺片內重現！讓觀眾細心回憶一下被自己遺忘嘅人同事，可能正在某時某地等緊你！
記者：許福合
唔差得過《日本沉沒》
《鬼域》由彭氏兄弟出品，佢哋近年喺鬼片界可謂打出名堂，所以今次製作《鬼域》時，不惜大灑金錢，運用大量電腦特技，港產鬼片中算少見。而所製作出來嘅鬼域，大部份環境都係黑黑暗暗，尤其九龍城寨同遊樂場一幕，效果真係唔錯，好多睇過近排熱爆嘅《日本沉沒》，都話《鬼域》嘅CG場面完全唔輸蝕畀佢，明顯今次港式電腦特技繼《少林足球》、《風雲》後又過一關。
最叫人共鳴嘅，係強大CG支援下，重現到七、八十年代嘅老香港情懷，將一堆大家真係暫忘咗嘅人、事同物重現眼前，令「3字頭」嘅筆者感慨良多。忽然間，好想相約爸爸媽媽歎番餐茶！
壯觀場面晒特技
值得深思嘅鬼片
故事方面，頭20分鐘仍然似傳統鬼片鋪排，尤其女角家中，經常有人影走過、發現超長頭髮同紙張無故飄走等，都係一般鬼片會出現嘅懸疑手法，不過即使睇完全碟，仍然唔知呢啲異象所代表意思。
事實上劇中好多地方都交代得較隱晦，尤其係女角進入鬼域前，交代更係不足。不過《鬼域》精采之處係進入鬼域之後，發現原來呢個空間收藏住好多被遺忘嘅人或事，好似童年玩具、已忘記嘅長輩等，到最後竟然發現陪女角歷險嘅小妹妹，原來係同李心潔有莫大關係！電影帶出「每個人都有些東西想忘記」，雖然被遺忘很可憐，不過記下亦好痛苦，以鬼片形式表達着實有一番新意，值得回味。
睇異世界誕生
片中可算只有李心潔擔到正，較重要就只有鬼域中嘅小妹妹，其他角色如李彩華等，只算係綠葉配角。幸好李心潔憑住輪廓分明面貌，配合迷茫眼神同演技，能帶出主題「遺忘」嘅傷感。
睇完DVD正場，記得煲埋特別收錄，因為內容算幾豐富，除咗必備彭氏兄弟同李心潔講拍戲感受外，亦有未曝光片段同製作特輯，可見到拍攝戲內異世界時，原來陽光猛烈，令人感到CG嘅偉大！製作特輯亦精選咗幾幕重點CG場景出嚟，方便重播欣賞。計埋設計手稿、原聲動畫等，今次DVD版可謂大件夾抵食。
驚嚇位好氣氛
《鬼域》使用電腦特技之外，鏡頭運用上亦好花心思，兩者配合下效果都唔錯！
3區雙碟版售價：$108
售賣點：DVDPro（23326326）
地址：旺角奶路臣街6E德發商場B4舖
