為咗力挺教改乜都講嘅教統局常任秘書長羅范椒芬（圖），噚日喺教統局網頁講會考啟示，話今年雖然有成25個10A狀元，但佢唔覺考得多科就一定好，又講有啲狀元要閉關兩年，犧牲好多，又話啲人可能報考10科，忽略其他方面發展，得不償失，叫啲人不如考6A以上就夠，啱啱好有6個A拔尖咪得囉。
羅太講講吓，又指點啲10A生，先話皇仁書院嘅10A狀元，幫行劫嘅同學求情，又話有10A狀元指學校阻撓佢哋報考10科，質疑𠵱家年輕人嘅品德，認為社會要好好關注，同埋唔應該將全部責任歸咎學校喎。
兜咗咁大個圈，羅太想講乜？八方睇到篇文下半截，就知羅太其實想講佢領導嘅教改，下年改到七彩，學生最多只可以讀7科，所以10A狀元將成絕唱，咁梗係要唱吓佢哋啦，又唱好吓學生讀少啲、人都輕鬆啲啦。