南豐大角嘴櫻桃街項目，原本諗住收購埋海明閣，咁就完整啲、剪裁得靚仔啲。點知傾咗一大輪都扯唔埋纜，南豐惟有放棄。蘭西日前睇報紙，見到有個海明閣放盤廣告，係13樓B，370方呎，叫價115萬，計落每呎3108。
翻查資料，南豐04年出價120萬至150萬，向小業主提出收購，若果咁計，𠵱家最少唔見咗4.2%，而呢個單位因接近頂層15樓，價錢應該高啲，若以150萬嚟計，就少收23.3%，都咪話唔傷。雖然海明閣部份業主當日都想賣樓收錢，但畀個別獅子大開口，搞喎咗，結果兩敗俱傷。𠵱家就算想賣，都肯定要畀人壓價。日後南豐個樓盤起好，海明閣業主可能不見天日，想搵人買就更難。咁啲低層，要用乜嘢價至賣得出，真係天曉得。