埃及國家隊教練哈辛舒哈達點兵備戰非洲國家盃外圍賽，壞孩子美度榜上有名。好記得舒哈達同美度喺年初嘅非國盃大炒一場，美度連決賽都冇踢，眼白白睇住自己啲隊友威，估唔到事隔半年，舒哈達始終要用番佢，唔知係代表佢兩個之間嘅心病醫番好，抑或係根本埃及猛將有限，冇美度唔得嘞。