最怕餐廳冷氣勁到人起晒雞皮，最怕凍到要披番件外套先可以開餐，最怕食物上枱唔夠幾分鐘，就好似喺雪櫃拎出嚟咁變到凍冰冰。有餐廳睇準呢一點，食物用法國銅鍋上碟，銅鍋最叻保暖，唔使用火㷫住唔會食到成身煙，唔信？做埋溫度測試畀你睇，包你歎到一餐暖笠笠法國菜，食完大叫窩心。
記者：黃若茵
攝影：何家亮
模特兒：Algie
馬賽式海鮮大雜燴銅鍋$70
立哥：「馬賽海鮮好出名，我揀鮮蝦、青口、石斑、帶子、蟹箝等海鮮一齊煮焗，個湯底熬到好鮮濃，點麵包食一流。」
保溫測試：
鮮茄醬香草白酒 煮藍殼青口銅鍋$60
用法國或荷蘭青口，肉質鮮嫩，先落白酒、黑胡椒加番茄煮，最後加羅勒、芫荽等香草，成鍋青口食晒都唔覺膩呀。
百里香味雜菌 燜紅酒雞銅鍋$63
立哥：「用雞公肉，肉質比較結實，焗完唔會鬆晒無口感。」用紅酒同香草醃1日，煎香再燜，雞肉夠味好香。
布根地鄉村風味 燜紅酒牛尾銅鍋$63
法國布根地盛產葡萄，用布根地紅酒醃製牛尾特別香濃。牛尾醃1日燜焗超過1小時，醬汁非常濃味牛尾超腍。
咖喱薯仔 燜羊腩銅鍋$58
新西蘭羊腩肉質較腍好嫩滑，肥肉唔多。羊肉燜過後有香濃咖喱味，連薯仔都燜得好入味。
澳洲帝皇鮑魚 小$388大$488
今年廚神大賽入圍作品，先用龍蝦頭同鮮魚熬濃湯，加帝皇鮑再熬多12小時，鮑魚充份吸收濃湯，好鮮。
酥皮魚翅 龍蝦湯$48
酥皮湯非常足料，有魚翅同埋龍蝦肉粒。湯底用龍蝦頭、鮮魚、西芹、洋葱一齊熬，有海鮮味又夠清新。
法國宮廷裝修夠浪漫
「珊瑚堡」喺香港仔開設第五間分店，一改以往深藍色海底嘅裝修設計，改用法式裝潢，公司代表Janet話：「今次進軍香港區，希望可以走高格調路線，所以間舖裝修到成個法國宮廷咁，希望畀到人寫意嘅度假感覺。一到夜晚餐廳就會校暗燈光，氣氛會變得好浪漫㗎喇。」又無吹水喎，由梳化暗花Pattern到一盞一盞嘅水晶燈，都睇得出店方刻意營造浪漫，同女朋友嚟呢度喫番個燭光晚餐應該唔錯。為配合法式裝修，餐廳特別引入法國Mauviel銅鍋，總廚立哥話：「銅鍋起源於法國南部葡萄產區布根地，初初農夫用銅鍋煎熟肉類同蔬菜就咁食，慢慢演變成先煮熟食材再放番入銅鍋焗。銅鍋菜係法國一種傳統地道菜，類似我哋香港人食嘅盆菜。」咁銅鍋有乜咁巴閉先？「鍋身有厚度，好保溫，你都知法國人食嘢食得幾慢㗎啦，一餐晚飯食幾個鐘喎，唔用呢啲銅鍋保溫都唔掂。」我做咗個簡單保溫測試，效果確係唔錯。「𠵱家用嘅只係細Size，啲銅鍋全部係法國百年老字號廚具牌子Mauviel，每個要大約$600港幣㗎。」咁巴閉？真係唔食都要摸吓個鍋啦。
食客有Say：無人識銅鍋！
搵食攻略
珊瑚堡（29561328）
地址：香港仔中心第二期商場一樓1、3、5號舖
營業時間：
星期一至五9:30am-11:30pm，星期六、日及公眾假期8:00am-11:30pm
全店座位：120個
人均消費：$80-$100
最好賣：西冷牛扒，日賣50份