近排最震撼影音界嘅，肯定非華仁會結業莫屬。筆者跟創辦人羅先生（人稱三叔）合作已多年，聽聞結業消息，當然感到可惜，想不到引起之回響居然那麼大；不但網上大大小小討論區爭相評論今次事件，多位同行及朋友致電筆者攞料，連飲茶嗰幾位收銀姐姐都有感而發，可想而知華仁會喺香港幾咁深入民心。
華仁會以最新水貨及抵玩價籠絡影音友，加上服務及維修等做得好，口碑及客路一向不俗。總結失敗，除報紙所講嘅行貨快過水貨、機款易舊減低毛利外，據電器街知情人士所講，最大原因係賣水貨及冧價而受代理封殺，幾個國際性大牌子全部唔供貨，咁仲點做落去？後期三叔欲減低對影音產品嘅依賴，試圖催谷納米手機、二手買賣、慳電膽同AVPC等，可惜仍未能力挽狂瀾。
上周五，多間供貨商到旺角旗艦店搬貨走，本來店舖結業在競爭激烈社會沒甚麼大不了，不過其中一間供貨商跟筆者討論帶出之問題，頗值得留意。就係事件後，各大小供貨商更為小心翼翼，數期將大幅收窄，旺角一堆樓上直銷影音店首當其衝，有行家更估計可能引發連環倒閉潮。
最後，筆者在此借版位支持一下三叔，期望他早日東山再起。冇可能？一年二億營業額都做到，有乜係冇可能！
記者：徐影龍