資深股票客戶謝太：喂Karen，謝太啊。我𠵱家係機場，差唔多要上機，今個星期個市會點？離開之前有冇買賣要做？
年輕貌美經紀Karen：早晨謝太，今個星期都係繼續睇吓算數，冇嘢好買。雖然唔再加息，不過係因全球市場卒之肯接受「美國樓市爆煲」呢個現實。
謝太：不過，美國樓價好似冇跌過？
美股大跌可期
Karen：係未跌。但美國樓市已經出現先兆，成交量大幅萎縮、存貨節節上升。不過問題係美國人借錢買樓嘅方法過分進取，猶如已經堆到好高嘅骨牌一樣，一推就會全面下跌。上個星期網上流傳5個統計，聽完都聞風喪膽。
第一，05年新造嘅按揭當中，有32.6%係還息唔還本，喺00年只有0.6%嘅新造按揭係咁──即係冇心還本，只博樓市繼續升。
第二，05年買樓嘅「第一次置業人士」，43%做十成按揭，樓市只要跌，佢哋就負資產。
第三，有15.2%喺05年買樓嘅人，欠嘅按揭銀碼，高過物業估值10%─即係已經負資產。
第四，喺美國所有有造按揭嘅置業人士中，10%借錢借到盡，變相做咗十成按揭。無辦法，喺美國實在太容易用物業借錢。
第五，亦係最大嘅問題，有成27000億美元嘅按揭到期，業主要再做按揭。如果樓市跌，業主負資產、資不抵債嘅就全部淪為「銀主盤」。
最後，我哋對家「美林證券」嘅分析員做過一個統計，就係美國樓市指數走勢對12個月之後嘅股市走勢，有高達八成嘅預測能力（見圖）。而呢個樓市指數好多個月之前已經開始大幅下跌。我用email寄個圖你睇。
謝太：嘩！個圖嘅走勢都真係好危險噃，都係返香港再算。