噚日，孫柏文起身開電腦，睇吓有冇新電郵，一睇就見到有個分析員前同事寄咗封電郵過來。封電郵嘅題目就係「如果當年大東電報局，冇賣香港電訊，八號仔嘅股東會點？」當時，我一見到條題，腦海即時有好多個「如果」（whatifs）類型嘅問題喺度穿梭。如果當年係大東繼續經營香港電訊，做嘅決定會否不同？盈利會否比𠵱家高？股價會唔會好似𠵱家咁？
我見到咁嘅電郵題目，當然第一時間開嚟睇。其實，封電郵本身只得個股價走勢圖，係大東自00年至今嘅股價走勢。咁多年嘅風風雨雨，咁多人痛罵李澤楷，攞佢做公敵，我覺得完全唔公平。因為我相信，如果當年大東真係冇賣香港電訊，八號仔嘅股東分分鐘會比𠵱家仲慘。唔信？你哋自己睇吓大東嘅股價走勢圖。
當年，盈科數碼動力最高見過28蚊一股，計埋當年將股票六合一，即係跌咗九成幾。如果大家睇吓大東嘅股價走勢，佢哋都係跌咗九成幾，仲有，大家一定要記得大東當年係成功高價賣香港電訊，如果冇做嗰單交易，相信佢哋會仲慘。所以喺呢個範疇上，大家千祈唔好留戀前宗主國嘅人。
做對沖 有錢收
講起前宗主國，前晚，孫柏文同個同事Greg睇英超聯足球賽。電視就播緊利物浦（Liverpool）對韋斯咸（WestHam）嘅球賽，開波初段，比數0比0。而我見到亞Greg佢眼都唔眨咁睇住個電視，都可以相信佢係個大球迷。我就好隨意咁問佢：「你支持邊隊？」佢望都唔望就答：「梗係利物浦！」就喺佢答嘅一刻，韋斯咸就入球，亞Greg隨即大喊：「有冇搞錯，好我見到佢好似對利物浦有好大期望，就問：「利物浦成日都會俾人入波，你都應該習慣。唔通，你啱啱先至支持利物浦？」亞Greg答：「梗係唔係，我由80年代尾已經係佢哋嘅fan屎。所以近十年八載，支持利物浦都係非常辛苦。好彩，佢哋近呢幾年都有贏過杯賽，不過始終都做唔到聯賽冠軍。」聽到呢度，作為一個財經口水佬，我第一個反應就係：「點解唔做啲對沖？只要每一場買少少利物浦嘅對手贏，就算利物浦到時候輸咗，都起碼有錢收。」
幾百蚊 見真心
亞Greg即答：「以前我真係有做啲對沖，買對手贏。如果利物浦輸咗，我就會收幾百蚊。不過，做咗一兩年之後，我最後都係決定唔做對沖。」我即刻問點解。佢話：「唔對沖嘅理由係我漸漸發覺，我希望利物浦輸。我原本諗住買少啲，就可以減少希望利物浦輸，但最後覺悟到，原來我對利物浦嘅忠誠，真係連幾百蚊都不如，我唔想再面對呢個現實，所以就決定唔再對沖。」故事教訓，市場真係可以提供更清晰明確、透明度高嘅估值。不過，有時有啲嘢真係唔知好過知。
孫柏文