前晚意大利超級盃上演意甲聯冠軍前哨戰，結果先落後0:3嘅國米加時後反勝羅馬4:3，呢個戰果違反意大利賽事少入波嘅特色，燦爛之餘搞到足智彩「孖膽」冇人中。最令國米躉安慰嘅，係新兵多數有好表現。
今場波雙方精銳盡出，國米派出伊巴謙莫域、韋拉等新加盟球星，不過，羅馬以一貫快速打法殺國米措手不及，34分鐘之內憑文仙尼同梅開二度嘅阿古蘭尼入波領先3球。國米完半場前由韋拉接應罰球頂入追番1球。
國米下半場開始挽回劣勢，憑基斯普及韋拉嘅入球追成3:3，最後費高喺加時階段射入自由球成功捧盃。
雖然國米重演前季歐冠盃決賽利物浦反勝AC嘅好戲，但係隊波慢熱兼防守效率唔夠高係最大弱點。
阿祖安奴處境好弊
輸波嘅羅馬節奏控制唔好，尾段冇氣致敗。至於球員方面，國米新兵對辦，但「阿祖」處境好弊，同伊巴夾唔到，被換出後球隊即入波，賽後教練文仙尼話係人被換出都面黑架喇！擺明當佢冇到！
不過，最唔抵嘅始終係香港球迷，意大利被標籤為悶波，但估唔到今場咁精采嘅賽事居然冇直播睇，認真係走寶！
「冇祖記，AC扣8分之後，今屆意甲聯冠軍非國米同羅馬莫屬？未必！從呢場超級盃可見，兩隊波各有不足之處，國米防守有問題，羅馬唔識收放；最後會唔會鷸蚌相爭，漁翁AC米蘭得利呢？」