何俊仁俾人喺中環鬧市打到口腫面腫，八方有朋友即刻叫佢嘅乖仔乖女唔好做律師，點知仁哥個黨友鄭家富不單止唔驚，仲話經此一役，會做番多啲律師工作。
阿富唔講，八方都唔記得佢讀法律，佢話自己喺2000年開始做全職議員，減少執業，其實佢一直做緊周啟邦律師樓嘅顧問律師，遲吓就會做埋合伙人。阿富咁勤力，其中一個原因係議員嘅收入微薄，每月五萬元，未計上繳畀白鴿黨，而佢就女細老婆抱病，要獨力撐住頭家一啲都唔易。
話咁快，阿富兩個囡囡已經亭亭玉立，大女去咗英國讀中學，二女就升中一，負擔都幾重，加上太太暫時要休息，返唔到工，佢只好搏老命搵錢。當然，佢同仁哥都係搵唔到大錢嗰類人，因為多數都係為民請命，義字行先。
八方笑佢不如考慮吓當副局長啦，有成廿幾萬人工，點知阿富一口拒絕，話一日未有真正由普選產生嘅特首，佢都唔會加入政府。