每日經過石板街，都會碰到一批又一批嘅遊客，三五成群，以日本男女為多，暑假期間，多咗一啲本地中學生。遊客到石板街有乜嘢睇？據講係附近有文物徑，追尋孫中山革命時代嘅歷史。香港人日日行過，唔覺得有乜稀奇。調番轉頭，我哋去到外國城市，咪又一樣！多年前有一次去巴黎，坐旅遊車經過幾間舊樓，導遊話：「呢度就係畢加索故居，當年佢未成名，冇錢交租，業主追得緊，佢就畫一幅畫畀業主賣當係租金……」我哋班鴨仔聽到嘩嘩聲，心諗業主咪發咗大達？人人伸頭去望，其實乜都睇唔到，舊屋一間，巴黎周街都係，如果唔係畢加索三個字，旅遊巴士邊度會去。
有人高調咁講，有歷史價值嘅舊屋，如果維修好，唔拆，仍然有意義，呢類舊屋維修完畢之後，要將啲「原居民」搬番入去住，先至叫做有「活文化」，先至有集體回憶。呢啲人嘅志氣甚高，唔敢批評。月前與一位香港掌故專家C食飯，掌故C收集大批香港十九世紀，二十世紀初年嘅相片，對街道變遷，如數家珍，左丁山聽佢講掌故，學咗唔少常識。左丁山問佢：「遊客沿石板街上荷李活道，經過士丹頓街一帶，究竟有冇畢加索故居之類嘅舊樓，仍有人住，保持咗活的文化？」掌故C話：「有一間算係革命先烈故居遺址，門口有一塊鐵牌，上有說明，一啲熱情遊客睇完就拍門，內裏住客不勝其擾，有時對遊客唔係幾客氣！」咁又係，如原址保留，維修，內設文物展覽，有專人駐守解釋，自不然歡迎遊客登門，但如果內有住客，日日見到陌生人上門，邊會高興㗎，你估住客係動物園裏面嘅北極熊，任人參觀，評頭品足乎！
空談還空談，實際還實際，「有人在內生活的文物館展覽館」實在係攞嚟搞。如果要實現理想，不如請有心人與區議會發動捐款集資，搵一間舊樓做試點，將舊樓全部維修妥當之後，請「原居民」返入去住，條件係「原居民」日日開門歡迎遊客入內參觀，不收費用。一年後睇吓點！