關你車事：四日速解　雪藏牌　DAIHATSUTERIOS

關你車事：四日速解　雪藏牌　DAIHATSUTERIOS

四年一度，唔係奧運、亦唔係甚麼歐洲國家盃，係我嘅「雪藏車牌」解凍之期。最近搬去住村屋，連帶有個車位，當然心癢癢想買番架車，自己偏愛四驅，但又怕太耐沒有揸車，舞唔掂大大架嘅四驅車，所以揀來嬌嬌滴滴的城市四驅DaihatsuTERIOS，容易駕馭，連開四日：郊遊、代步、買餸Shopping……對我車牌加速解凍有幫助，好合適女仔及新牌仔選用。
記者：陸伊琳
攝影：黃子偉、陳陶鈞
協力：黃婉冰、鄭達基
模特兒：Vicki、Ada

Day1　去球場打波，操作簡單，易睇位。

■個Brake敏感度都好適中，不會太輕或太重，你看，以我雪藏牌的技術，放在前座的袋都未被拋到地上。

■嘩，你好似買車一樣，左坐右坐，你中間個位嘅安全帶係可以成條收到車頂上。

■按下中央差速按鈕，恒式四輪驅動系統啓動有助防滑。

Day2　揸得熟，開車買餸準備大食會，好友Vicki試揸都Ok。

■車仔細細，街市停滿貨車及死車，TERIOS都穿梭其中，泊位無問題。線條好硬朗，側面好Cutie。

■採用布椅，啲餸或是Shopping戰利品放在座位上都沒有滑下，感覺又Young，襯番個車款。

■Vicki覺得個倒後鏡大番啲就更好。

Day3　老公想食糖水，飛車去元朗買外賣。

TERIOS有多角度投射車頭燈及霧燈，十分方便，儘管久未開過夜車，兼遇毛毛雨，都沒問題呀。

■同行Ada想堂食，我慰夫心切及無位泊車，強迫她上車食。

■雖不至倒瀉糖水，但感覺架車避震硬咗啲。

Day4　雪藏牌正式解凍，去西貢BBQ及影相。

■原來個油缸門掣不在慣常的軚盤右下方，呢架車個油缸門掣係喺司機座位下，等我仲搵咗成5分鐘。

■雖然芒果黃好受女仔歡迎，但遇上呢個情形，有點尷尬，工程車？唔怪知得我老公力勸我買黑色，有型好多！

■泊在泥濘、上石壆都OK，話晒都係四驅嚟嘛。

無尾又高身一揸就上手

呢四日用車，同行的友人反應都好怪，女仔一見架TERIOS就一見傾心，車仔細細，顏色好搶，相反男士們見到就笑我揸工程車，略嫌架車沒有四驅霸氣，好似女仔車。
係，我係女仔！對架車表現大致都好滿意，車身不大，由於係四驅關係，車身比較高，容易睇位及視線可以望得遠些，既合女仔選用，又合新牌仔、雪藏牌，一揸就好快上手。油門及Brake輕重適中，佢嘅恒定式四驅動系統及中央差速鎖模式就最為方便，在天雨路滑的情況；泥濘或起伏不定的路面大派用場，開動後明顯輪胎加強了抓地力。總結表現都有8分（10分滿分），1,500c.c.不太食油，而且車價亦算經濟，15萬元有找，只是略嫌上斜唔多夠力水，就算微微上斜最好都要推到低波。

DaihatsuTERIOSSpecifications

引擎：1,495cc直4DOHC
馬力：105ps/6000rpm
扭力：14.3kg-m/4,400rpm
傳動：4前速自動波箱，恒式四驅
車價：$149,985
車輛提供：皇冠汽車（24766138）