逢禮拜六日都收到領匯旗下商場的活動通知，昨日係咩「精靈猿人」，內容雖然冇乜興趣，但可知呢間機構好努力，比諸房委會時代十年都冇一條消息，進步不可謂不驚人。私營化值得支持，大政府效率必低，領匯係好好證明。各位如果唔信，請去厚德商場行一轉，呢個場領匯改造咗一半，另一半停留在房委會時代，只要用十分鐘由頭行一次，保證你唔會再支持陳偉業嘅論點。
「零售地方」有「壟斷」危機
香港新市鎮商場化，將軍澳馬鞍山甚至沙田等人口密集地區，市民「無街」可行（即係冇街舖，同旺角尖沙嘴傳統購物區不同），迫晒上商場。商場集中在幾個大財團手上，呢個趨勢發展落去，「零售地方」有「壟斷」危機。大家行商場會愈嚟愈悶，商戶租舖做生意愈嚟愈難。領匯旗下有百八個場，遍布港九新界，係唯一可以抗衡大地產商嘅勢力。如果佢繼續房委會嘅水平，地產商最高興。
上周領匯開股東會，「壞孩子」基金代表何志安曝光成為新聞人物，冇人理個會講乜（其實四個管理人董事齊獲八千六百萬反對票，票源何來好值得關注）。呢位30歲嘅「壞孩子」，公眾只知佢係TCI香港區代表，寫字樓在衡怡大廈，本身在澳洲讀大學，一級榮譽。佢真正嘅底係點？家世如何？佢點解咁得閒行晒全部領匯商場？神通廣大嘅周刊，華華等住睇大家表演。
股東會後，主席鄭明訓說不擔心領匯被人高價收購。言猶在耳，鄧普頓個Fund即刻宣布揸咗超過5巴仙股權，加埋TCI18點幾，已近兩成四，好耐之前德銀都揸過5巴仙以上，仲搞到同該行做顧問嘅鄭主席一身蟻。除咗TCI同鄧記個基金之外，仲有幾個基金大手揸領匯？
TCI投入領匯嘅資金逾45億，平均價十一個幾，賺成5蚊一股，亦帶挈小股東賺大錢，但政府就好尷尬，但願呢個人人賺錢經驗唔會成為其他機構私營嘅障礙。
[email protected]