今日講嘅係一套自編自導電視劇，叫《女人唔易做》之〈資訊爆炸年代〉。時間係清晨8點；地點係我屋企洗手間；人物，係一個望住支toner發呆嘅女人，即係我。
劇情簡介：前幾日同皮膚科醫生史泰祖傾開化妝品，我問點解收縮水、爽膚水英文可以叫toner，但有乜嘢分別呢？
佢話簡單講，收縮水多數有酒精成份，酒精會對皮膚造成輕微刺激，令皮膚微腫，毛孔就會收緊，「誇張啲講，好似打你塊臉幾巴，但紅腫程度梗係唔同。」我下意識咁掩住塊臉。佢又話，爽膚水未必有酒精，可能用另一啲物質收縮毛孔，或者有其他滋潤成份，「最好睇標籤究竟有無酒精。」
「用toner係多餘嘅。」佢解釋，呢類化妝品就算收縮到毛孔，都只係短暫，冇耐啲毛孔都會張開番，「洗完面應該直接搽潤膚膏，用toner呢個步驟根本應該skip咗佢！」佢話如對酒精敏感，更加唔好用有酒精嘅toner。
所以呢排用親toner就會諗起史醫生呢番說話，但又唔捨得唔用，因為收縮毛孔，令皮膚細緻啲喎。噚日同同事明明姐講起，佢一句話，令我精神晒，「收縮毛孔一陣？只要靚，一陣都係好嘅！」喺呢個資訊爆炸年代，消費者知多好多，但有時幾矛盾，尤其係貪靚嘅女人。史醫生，sorry。/(＞_＜)\
逄周一至周四刊出