湯寶如同譚詠麟（阿倫）、曾志偉、李珊珊、錢嘉樂等噚日喺上海賽車場參加柯受良紀念盃之兩岸三地明星慈善賽，佢喺女子組賽事中，同內地女星姜培琳炒車，兩架車嘅車頭都撞爛晒，現場嘅工作人員即刻扶佢哋落車，經過檢查傷勢後，好彩兩個人都冇乜事，湯寶如只係輕微扭傷頸，對方就扭傷腳，真係執番身彩。
余文樂衝沙地
結果女子組由內地女星劉濤得冠軍，男子組就由林志穎得冠軍，香港代表就只有錢嘉樂得第三，余文樂賽賽吓成架車衝落沙地，好彩人冇事。今次賽事主要為做善事，大會諗住將籌得嘅善款全部捐畀香港明星足球隊嘅慈善基金，用嚟喺內地建小學，呢個係柯受良生前嘅心願，佢個仔柯有倫噚日都有出席比賽，仲話好感激咁多人嚟支持活動。
