香港最地道嘅食肆非茶餐廳莫屬，由中環商業區至新界屋村，梗有三兩間喺左近，唔少人一日三餐都鍾意喺茶餐廳解決，原來外國都有茶餐廳Diner（餐車）。Diner，查字典譯餐車式簡便餐廳、路邊小飯店，係50至60年代美國獨有，正在有風味，兼唔似港式茶餐廳咁早餐A=午餐B=晚餐C，早午晚三餐都可以食出驚喜。
記者︰方綺君 攝影︰楊錦文
模特兒︰Ruby
充滿50年代色彩
時光倒流，歡迎大家返到50年代美國東北部。講起美式餐車（Americandiner），我即時諗起出現過N咁多次嘅電影畫面──烈日當空下嘅小鎮，嚟咗幾位揸哈利嘅彪形大漢，落車後第一時間踏入Diner，坐低，邊啃漢堡包邊昅女。Diner畀人嘅形象就係咁，市井、地道、有風味，一如香港茶餐廳、法國Finedining、中國傳統茶樓一樣，極具代表性。到咗今日，Diner飲食文化已經變為別樹一格嘅Casualdining，而「BigErnies」就特登裝修到同傳統Diner一樣，不銹鋼、木紋板、銀藍色座位同高櫈裝飾，全部都係Diner特色，充滿美國50年代色彩。
菜式份量勁大
就如去港式茶餐廳必點咖啡奶茶餐蛋麵，去Diner就必點漢堡包同三文治。打開餐牌，漢堡包、牛肉熱狗、費城芝士牛肉包、魯班牛肉包，見菜名如見美國，統統都係美國經典美食。50年代嘅美國，餐車係左鄰右里最鍾意去嘅搵食點，絕對解決到一日三餐，因為美國菜式通常都係大大份，大份，至代表抵食。Ruby一見餐廳捧出嚟嘅食物就大嗌︰「使唔使咁大份呀，一個女仔邊食得晒？」無吹水，單一個漢堡包，份量之大足夠3個女仔一齊Share。
秘製漢堡包配烤洋葱、芝士及BBQ汁
漢堡包係美國象徵，必試！自製漢堡扒用BBQ汁醃1晚，加炒洋葱、芝士同酸雜菜。有相為證，拎上手半個人頭咁大，一個包頂到兩餐。
香煎肉眼牛扒伴自製薯條及蘑菇汁
大廚話︰「靚扒唔使醃。」新西蘭肉眼扒簡單煎至6成熟，鎖住肉汁，配美國菜絕對少不了嘅薯條同自製蘑菇汁，肉眼扒香軟嫩滑，果然係靚扒。
全天候早餐
全天候供應以解口痕友需要，傳統美式早餐有雞蛋、腸仔、煙肉、火腿、薯條，咁大份一個女仔未必啃得落，計我話當晚餐食都仲得。
魯班牛肉包
大廚話︰「Reuben（魯班牛肉包）喺美國好耐歷史，仲曾經攞埋獎。」Reuben裏面一定會放鹹牛肉、酸椰菜、芝士同千島汁，份量多又有芝士又有肉，食一個已經好膩。
特色雜錦沙律
真係乜都勁大，呢個沙律用大湯碗上，餡料有烚蛋、牛油果、洋葱、番茄等等，淋酸酸甜甜嘅法汁，係個好開胃嘅菜式。美國菜多數多肉多油，食個沙律清清腸胃都唔錯。
葡萄蘋果批
蘋果批加入葡萄、肉桂，建議一啖批一啖雪糕慢慢食，可以稍稍中和甜味。又係嗰句，太大件，喫幾啖已經好夠，一個人食會太膩。
睇埋裝修
美國Diner通宵營業
Diner的前身是流動餐車，50至60年代的美國東北部如新澤西州、長島最流行。Diner一般都會提供快餐，因為價錢大眾化所以極受美國人歡迎。二次大戰後，美國鄉郊發展迅速，很多人都視開設Diner為良好商機，所以Diner開到成行成市，市區、小鎮、甚至高速公路旁都會見到Diner的足迹。現在美國很多Diner都24小時營業，已經成為美國城市飲食文化的一部份。
搵食攻略
BigErnies（25205303）
地址︰灣仔駱克道33號A地舖
營業時間︰星期日至四10:30am-2:00am，星期五及六10:30am-3:00am
人均消費︰$100-$150
交通︰灣仔地鐵站C出口，向右沿駱克道前行直達
座位︰35個