Skype出現，扭轉了傳統IDD及固網電話遊戲規則；BT及YouTube出現，打破了傳統影視事業框框；Gmail出現，則完全擊潰了傳統ISP電子郵件業務模式。𠵱家，有一種新的商業模式，將會一鋪「搞掂」住宅寬頻及流動電話業務。始作俑者，FON是也。
FON嘅idea，係透過一個小軟件，將用家的無線寬頻（Wi-Fi）路由器變成「FON熱點」，再分享畀範圍內任何FON用家上網，終極目標係變身全球最大嘅Wi-Fi網絡。
簡單講，FON將傳統的互聯網消費者，同時變成互聯網供應者。以𠵱家情況為例，用家原本係畀錢享用互聯網嘅頻寬（Bandwidth），用咗FON之後，掉番轉可以將用唔晒嘅頻寬，透過Wi-Fi同其他人分享，甚至獲利。咁搞法，可以預見傳統網絡商勢必反枱，因為FON咁做不僅搶去Wi-Fi網絡商嘅飯碗，仲大大增加其營運成本，唔反枱勢係假。
講起Wi-Fi，呢個技術面世咗多年，好多人以為已經江郎才盡，個個諗住放眼未來旨意Wi-Max，點知FON的CEOMartinVarsavsky憑一條老橋「Sharing」，掀起一場驚世互聯網革命，因為以後人人係Wi-Fi用家之餘，仲可能同時係Wi-Fi供應者！
FON至今已經有超過兩千萬美金嘅資金注入撐場，當中除了Skype同Google等猛料公司揼水外，當中不得不提的，仲有當年有份幫Google起家，近來又揼水投資YouTube發圍的SequoiaCapital。SequoiaCapital無寶不落，怕且今次都唔會死錯人。
網上行NOW夠條件
3G前車，瀝瀝在目，其失敗正正在於網絡商當初衰貪心，以為推3G可以慢慢來，向政府施壓只係發出幾個牌照，以為少隻香爐少隻鬼，點知弄巧反拙，令3G普及力量立即大減。班網絡商𠵱家先醒覺，後來先發力推廣3G普及，可惜前無去路（因有Wi-Max），後有追兵（FON已面世），完全可謂咎由自取！思哲在此提醒各網絡商，下一浪即將靠岸，千祈咪諗住迴避，反而應該第一時間全力擁抱FON。
以李澤楷為例，想成為真正嘅娛樂大亨，他現在最需要的籌碼，就是網上行和NOW，因為兩者均有入屋的解碼器，只要稍為改動，加入FON嘅陣營，爭取成為FON在香港的最大代理，咁做肯定不至俾網絡革命巨浪沒頂之餘，反而大有錢途。至於城市電訊，亦毋須擔心核心業務受損，反而應該利用100Mbps寬頻的優勢，與FON結合，闖出新天。
不過，思哲擔心本地網絡商好似沒有這種先見之明，現時他們的思為模式，仍停留於認為不懂上網和BT的依然大有人在，所以新網絡技術對本地營商環境影響應該不大。咁諗其實好弊，因為𠵱家就連師奶，為咗同孩子溝通，也開始學習上網了，睇少香港人適應能力的網絡商最終肯定會被淘汰。
新一代網絡事業，潛力高深莫測，新商業模式瘋狂地湧現。可憐某啲網絡商，到𠵱家都仲只係專門做些增值服務，不要開玩笑了，互網絡上還缺些甚麼呢？網絡商，你們的頭腦似乎還未清醒。
想像一下，未來就是一個全新網絡世界。傳統電訊商業模式，將被一筆勾消。在全球Wi-Fi免費的模式下，IDD、固網電話、寬頻上網的邊際利潤將趨向零，遊戲和電話將成為新模式底下的KillerApplication。以往，固網商與用戶間嘅交易，係一組電話號碼，以後，將會變成靠一條頻寬，然後客戶利用這條頻寬打電話、上網、玩遊戲。邊個唔緊隨呢個大趨勢，將來只會係輸家出局。
Blackberry花5億打官司
寫咗咁耐，但思哲依然覺得，他日FON大行其道，班網絡商興師問罪的機會還是很高。他們或許會認為：我哋辛辛苦苦建網，豈容你哋來抽水？因為在美國，早已有網絡商Verizon高層發炮批評Google的例子。
資訊科技業界，向來訴訟特別多。另一個例子，就是Blackberry的製造商RIM公司（NASDAQ：RIMM）。根據06年的年報，RIM今年的營業額非常耀眼，賺超過20億美金，比05年上升52.9%，但扣除包括訴訟費的成本後，竟然只係微賺3.8億。何解？因為Blackberry與聲稱擁有「PushEmail」專利的NTP打官司，所使嘅錢雖然比05年下降了42.7%，但仍要畀成2億美金，兩年合共使咗超過5億美金。
高昂的訴訟費背後，帶出咗美國專利基制。無論技術是誰先發明，得益者依然落在首先申請專利的一方，不過，發明了新技術不去申請專利的，又可以怪邊個？大家可能會認為抵死。事實上，有些公司是發明了新技術，而不想申請專利的（可口可樂就是其中一例），事關一旦申請，便要等同將所有專利秘密公開，給其他公司得到資料，加以改進，很可能推出更先進的技術。
於是，就出現了某些公司，在寧願沒有專利保障的情況下，堅持不申請專利。若然沒有申請專利，技術又被人破解的話，咁就死有餘無辜。
尹思哲