過多4個交易日，港股8月份月結埋單。上月底至今為止，恒指微跌16點，H指升39點，幅度唔大。估計短期內好友淡友做嘢，都只會懶懶閒。
中企P輪3690：H股進入半年業績宣布期，市場似乎鍾意宣布嗰隻跌嗰隻，H指有壓力，搵H指P輪短炒，執一盅兩件。正路對象係3690，10月下旬到期，輪價16仙，溢價2.4%，槓桿率13.9倍（有效8.6倍），引伸波幅28.1%。
4842亦係熱門貨，得番1個月壽命，輪價6.7仙，溢價3.9%，賭呢隻蝕章。
國壽P輪4902：國壽（2628）今日派半年成績表，上周五跌0.16元。P輪4567由6.3仙飛上9.1仙，飛升44%，有278球易手，金額24球。唔使眼紅炒家1日之間賺到笑，睇番轉頭，6月中最高價1.47元，到𠵱家同totalloss冇乜分別。隻輪11月尾夠鐘，行使價10.88元，正股要喺3個月內散2.82元以上，隻輪先至唔使用嚟墊煲底。就算炒國壽業績見光死，都無謂搞4567。
要搞，搞隻較遠期嘅4902，溢價13.1%，一啲都唔低，但明年3月先至到期，溢價唔怕縮得太快。
章盛