臭臭臭！朱師奶屋企三代同堂，人多，廁所用量就梗係多啦！個廁所一日洗六次都仲係有陣味，多多潔廁液都唔夠呀……煩緊點樣可以慳住洗？喂！有幾難呀？打開個雪櫃廚房櫃儲物櫃，用剩多餘嘅嘢統統可以洗！唔信？睇吓我點教你！
記者：葉雪芯
攝影：陳盛臣
模特兒：Catt
屎坑窿
5大另類潔廁液
喺三代同堂習慣慳家嘅朱師奶字典中，係無「嘥」呢個字嘅。所以過期沐浴露、飲剩的可樂、橙皮……都能物盡其用洗屎坑。
薄荷葉清新靚廁
個廁所喪洗都仲係有臭臭，試吓用薄荷葉啦！先將薄荷葉用熱水沖一沖，然後放進舊絲襪中，見到馬桶邊度有污糟就捽吓，再拉水沖廁，即刻散發出陣陣薄荷香！半両薄荷葉都係五蚊雞，使乜用化學清潔劑呀？
可樂沖廁
飲剩咗啲可樂，點算好？倒咗佢囉！喂，我叫你倒落馬桶呀！鹽酸可以清除廁所的污迹，而可樂乃碳酸飲料，與鹽酸有類似功效，所以用佢嚟清潔馬桶內的尿垢或者水迹就最有效。
苦瓜鮑魚刷
原條苦瓜切頭可充當鮑魚刷用來洗馬桶。因為苦瓜中含鹼性物質，植物中的纖維亦有助洗刷，其他瓜類好似青瓜、勝瓜、黃瓜亦一樣得。
橙皮除尿迹
飯後食完橙，朱師奶習慣留起橙皮，用3至4塊裏裏外外捽馬桶。由於橙皮上的橙油成份有清潔作用，能除尿迹污垢，洗完仲會散發出橙香味㖭！
過期梘液當潔廁劑
過咗期嘅洗頭水或沐浴露，是上佳清潔用品，因本身就具清潔效用，變質後利用來㨘廁所就可省回潔廁液。
㨘廁123
依序更白淨
1.馬桶內緣出水口處和底座內側都是藏污納垢的地方，容易沾染尿迹、糞便等污物，所以應先向馬桶裏面位置唧入適量嘅潔廁液或上列奇招，然後用廁所刷或鮑魚刷順時針洗刷馬桶邊。
2.洗好廁邊後，再向馬桶中間位置來回洗刷。
3.蓋上馬桶蓋5-10分鐘，等清潔劑發揮潔廁效用，然後沖水。
屎塔蓋
注意縫隙位
馬桶內壁固然積存大量黃斑及污垢，但屎塔表面及其餘地方，如水箱等，都不容忽視。尤其是水箱清洗得宜的話，連帶屎坑都清新亁淨啲㗎。
牙刷蘸番梘㨘表面
深入屎坑部份以外，馬桶表面及廁板、廁蓋都一樣黃黃黑黑，又霉又濕，尤其馬桶蓋附近位置有好多小縫隙，更難擦淨！用舊牙刷蘸少許番梘，來回刷十數次，然後用花灑沖洗小縫隙及屎塔表面，利用花灑水力沖走污垢，污糟就無咁易積存！
水箱出動防菌漂白水
先關上水掣，打開水箱，把剩餘的水沖走。
倒少許漂白水於廁刷上，抹拭水箱內壁。洗淨後才開回水掣，讓水注滿。定時倒入開稀的漂白水入水缸，可防細菌滋生。
屎橋
馬桶備忘保衞生
1.閂蓋沖廁
沖水時，馬桶蓋記緊要蓋上。馬桶內的瞬間氣旋最高可以將病菌或微生物帶到6米高的空中，並懸浮在空氣中長達幾小時，然後落在牆壁和物品上。香港地地方咁細，一般家庭，如廁、洗漱、淋浴都在同一個衞生間進行，牙刷、漱口杯、毛巾等與馬桶共處一室，很容易受到細菌污染。唔養成沖水蓋上馬桶蓋的習慣，隨時食咗唔少細菌！
2.免用布質廁板墊
因浴室潮濕悶焗，布質的廁板墊圈最好不用，如果一定要使用的話，應經常清洗消毒。
3.勤洗鮑魚刷
每次洗完馬桶，別忘了功臣鮑魚刷。刷子上難免會沾上髒物，故每次用完後應隨手再向刷沖一次水，將其沖洗亁淨，把水瀝亁，然後噴上消毒液，或定期用消毒液浸泡，保持清潔亁爽。
4.萬用消毒王
種種環保法外，若屎坑真的太污糟，可以1:49的漂白水倒入馬桶內，冚蓋隔一晚，然後照正常程序洗刷馬桶，效果會更明顯。
