【本報訊】「呢個價錢梗係蝕啦，賣一部就蝕一部……」正在灣仔會展舉行的本年度電腦、通訊及電子產品展昨日吸引八萬名公眾人士入場參觀，傍晚5至6點人流達頂點，幾乎迫爆會展。全場最矚目的是三星、BenQ、飛利浦、Acer、Topcon等品牌爆發的LCD屏幕割喉減價戰，17吋LCD屏幕跌破千元大關，僅BenQ一個牌子，開幕兩日2,000部特價LCD屏幕已火速售罄，今天仍有數百部新到LCD屏幕「筍貨」應市，預料再掀搶購熱潮。
BenQ產品經理阿Ben昨日表示：「原本以為將17吋LCD屏幕減到1,199蚊已經好有競爭力，嚟到先知對手即場劈價，我哋咪就又拿拿聲跟住減咯。噚日朝早最初係飛利浦減先嘅，佢哋將1,399蚊嘅MON減到999蚊，三星跟住又將740N17吋MON減到999蚊，我哋就由星期五中午開始，將價錢減到低過佢哋，賣到959蚊，啲客人即刻湧埋嚟。」
「真係會蝕死㗎」
飛利浦產品經理譚先生表示，該公司已賣出逾700部「170S」17吋LCD屏幕，全部只售999元，公司之後緊急調動貨源，希望滿足買家需求。「人多嗰陣，我哋呢度排咗超過20至30個客，佢哋唔介意等，仲唔需要試機即刻畀錢拎走，我覺得好誇張咯。」
三星一名工作人員透露，該公司合共賣出了300部999元的17吋LCD屏幕。「17吋MON跌破一千蚊，太平啦。呢個價梗係蝕啦，賣一部就蝕一部，唔好講話我哋，無論BENQ定係飛利浦、Acer抑或Topcon，間間都蝕㗎啦。聽講仲話有人賣過777蚊一部，咁搞法真係會蝕死㗎！」
「排隊排咗好耐先買到呀！」文太昨日排隊20分鐘才買了一部17吋的特價LCD屏幕，給即將開學的11歲兒子。同樣提着一部LCD屏幕、約20歲的劉先生表示，雖然等了很久，但可以不足一千元買下一部LCDMON，代替家裏的「豬頭MON」，都算便宜。
