明年屆退休之齡嘅警務處處長李明逵去向成為近排城中話題，坊間一時傳佢會接替李少光做保安局局長，一時又傳佢會從商，甚至做證監會主席，咁究竟李Sir退休後情歸何處？
一哥噚日一口氣接受兩間電台phonein節目嘅訪問，話題當然離唔開佢嘅退休動向，佢話自己明年就57歲，已屆警務處處長退休法定年齡，佢累積嘅假期足可以喺上個月開始放退休前休假，根本唔係提早退休，亦唔係如外界所講為咗警隊順利交接，只係根據公務員退休程序去做。
一哥又話自己只係一個平凡人，只係佢今日做咗一個不平凡嘅崗位，「做完呢個崗位後，會做番平凡人，過番啲平凡嘅生活，做自己鍾意做嘅嘢，花多啲時間陪吓屋企人，打吓波，煮吓嘢食咁。」
自嘲無政治智慧
李Sir話佢無興趣做保安局局長或證監會等其他受薪職位，因為佢無政治智慧，又話佢做警察多年，要做保安局局長會有好大難度，兼且佢唔需要為錢或生活而去工作。佢又形容自己係「死牛一面頸」，做唔做局長係個人意願，非他人可以勉強。
李Sir呢種渴望退休後過平凡生活嘅作風，同幾位前任一哥大相逕庭，好似首位華人一哥李君夏，喺94年退休後，立刻得到首富誠哥嘅器重，收歸和黃集團做顧問，有傳今年佢會離開和黃，正式享受退休生活。至於佢嘅繼任人許淇安，退休後加入呂志和嘅嘉華集團，做常務董事。唔知係咪見到前兩位一哥都退而不休，連特首細佬曾蔭培，都想喺商界大展拳腳，退休後入咗新創建做執行董事。