暴躁影帝近年拍嘅電影票房麻麻，好彩大導演間唔中都會搵吓佢，等佢保住人氣，之不過暴躁影帝太過大細超嘞，呢輪拍緊大導演嘅戲，另一部戲搵佢拍宣傳海報，佢就唔肯影。大佬呀！拍完部戲要做宣傳同拍海報係行規嚟㗎，點都冇可能話要專心拍大導演嘅戲而唔畀期人哋，搞到幾乎反晒面先至肯畀期人哋拍呢？關仁覺得有時唔使咁現實，如果暴躁影帝個朵臭晒，仲邊有人搵你拍戲呀！
唱K偷食甩身
唱K份人花弗，不過啲女仔就好冧佢，佢同宮女歌手拍拖都一段時間，之前宮女歌手幫三色台出埠做節目，要去成兩個月咁耐，咁唱K梗係唔放過呢個機會偷食啦，好快就搭上咗之前同天王傳過緋聞嘅發脹港姐，仲諗住同宮女歌手分手，宮女歌手返咗香港之後，唔單止冇同唱K詐型，仲即刻走去箍煲，又唔計較佢同發脹港姐啲嘢，卒之唱K飛咗發脹港姐，又同番宮女歌手一齊，真係好命咯。
牛天王開騷無期
牛天王本來想出年喺紅館開騷，但係俾有關方面拒絕咗，關仁聽聞原因係同幫佢搞騷嗰位肥嘟嘟老細有關。話說肥嘟嘟今年喺紅館攞咗好多個期搞騷，但佢呢頭用阿A個名入紙，嗰頭搵阿B做騷，甚至試過用內地雜技團名義申請，跟住將個期畀咗你仲醒，康文署認為肥嘟嘟咁嘅做法好有問題，但由於冇明文規定話唔可以將檔期轉讓，惟有喺佢幫牛天王入紙嗰陣ban佢，牛天王慘成犧牲品。
Textby關仁