患有先天性腦血管畸形的利詠然，八歲時病發昏迷半年，蘇醒後卻喪失記憶、語言與活動能力，終憑不屈心志與家人無限支持「重新做人」。漫長的復康過程裏，詠然從未言棄，積極挑戰生活與學習上的無數障礙，現在她最期待的，便是快些開學，一嘗大學校園生活感覺。
眼前坐在輪椅上的詠然，話音雖有點點不清，偶爾更有些口吃，但談到開學種種時，面上難掩興奮神采。20歲的她說：「呢個暑假過得最開心，因為遲啲可以去理工大學讀副學士，住嗰度嘅宿舍，唔使媽媽咁辛苦照顧我之外，又可以試吓獨立生活，自己整嘢食。」
尋常的生活小節，對於詠然也是挑戰，十多年來一直守候在女兒身旁的利太說：「詠然八歲生日時，日頭開完生日會，凌晨突然聽到佢好悽厲咁慘叫一聲，入房就見佢已經嘔晒白泡，送到醫院先知詠然係先天腦血管畸形，突然中風，要即刻做手術，之後就昏迷咗成半年。」
醒後失憶癱瘓
回想當年愛女驟逢不幸，利太仍猶有餘悸：「送去醫院嗰陣，都以為個女救唔番，做完手術又變成植物人，啲親友都話日日去睇詠然都冇用，但我哋就無放棄。直至個女醒番，唔認得父母，全身癱瘓又講唔到嘢，先感到痛心。跟住詠然再住喺醫院成年半，先叫做講番到嘢，但比𠵱家就更唔清楚。」
出院後，詠然面對最艱辛的考驗：「媽咪為咗畀我喺正常學校讀書，每日陪我返學，隨時照顧出入同去洗手間。但我中過風，做過半年植物人，條腰同頸都冇力，坐唔直，會側埋一邊，坐廿零分鐘，個人就會好攰，上堂都幾辛苦。未出事前可以游水、跑步，但醒番就唔得，淨係可以睇同學玩。記憶力又差好多，好快就唔記得啲嘢！」
有口難言的無奈，更叫詠然洩氣。她說：「啱啱返學時，我講嘢好慢同表達唔到，有時想問老師問題都講唔出，好唔開心！好在學校個個都好照顧我，同學有時見我着唔到外套，會幫我手，而我就慢慢練講嘢，迫自己先喺個腦諗清楚要問乜，點樣表達，中學時情況已經好好多。」
會考取得佳績
除學習困難外，詠然還要無時無刻為身體機能而戰。她說：「我學得比人慢，每年暑假都要預備定新學年嘅書，諗定有乜唔明要點問；平時就經常玩電腦『接龍』一類嘅智力遊戲，鍛煉腦筋。不過最緊要都係做運動，每日七點就要起身做一個鐘頭運動，好似行樓梯同屈腿咁，食完飯又再做過，否則個人會無力同隻腳嘅肌肉會萎縮。睇到自己嘅體能不斷進步，到中學時，個人先開心番！」
迎來蘇醒奇迹，跨過復康路上種種難關，詠然兩年前會考更取得2A2C佳績。她說：「我一直好有興趣做會計，希望第日向呢個方向發展，所以都修讀會計同財務嘅副學士課程，呢個暑假最好嘅節目，就係成日上網睇理工大學嘅地圖，研究第日喺宿舍點去課室，路程最短，其他設施又喺乜地方！」