激玩潮車：$2,500無牌飄移！遙控車甩尾

「OverOver！我係交通部陳Sir，啱啱發現有一班人喺粉嶺黃崗山玩緊甩尾，兼且懷疑佢哋所有人都係無牌嘅，現要求上級增援……」不過，陳Sir似乎睇錯咗，呢班車友係就係玩緊甩尾，但用嘅唔係真車而係甩尾專用嘅遙控車，乜家陣玩遙控車都要有車牌㗎咩？
記者：鄭達基
攝影：陳盛臣
查詢：偉高模型（23840003）
場地提供：PYC遙控賽車場（27806070）

16款車殼任揀

哈，我問班車友之後，終於知道陳Sir點解會睇錯，原來呢啲由專門製造遙控車，兼來自日本嘅Yokomo所生產，所用嘅車殼都係跟足日本D1甩尾真車去造，合共有16款，當中包括屬S13及S15款嘅NissanSilvia、NissanFairlady、ToyotaAE86、ToyotaSupra、MazdaRX-7等等，像真度很高，尾翼跟頭唇都有，原來連胎軨都跟番真車用電鍍，入面仲有埋鑽孔煞車碟㖭！咁仲唔止呀，原來佢哋同真車一樣，咩都有得改裝，就連摩打及變速器，都有專為甩尾而設嘅型號，問你怕未。至於價錢方面，入場費大約$2,500左右啦！

■雖然係遙控車，但可以用嚟玩甩尾，過程跟用真車一樣刺激。

甩尾車手都話好玩

咦，原來本港著名甩尾車手James都在場，咁就梗係要訪問佢覺得玩呢啲甩尾遙控車過唔過癮。「我雖然玩甩尾遙控車只係個多月時間，但已經覺得同用真車咁好Feel，一樣係咁刺激；另外如果要玩得好，最緊要係睇吓點樣改裝部車，而且特製專用甩尾輪胎，中央特別加有膠圈，若玩得太耐或甩得太勁而脫落，只需花約$50把它們換掉，就可重新落場再玩過。」

■跟足本港甩尾車手James部Fairlady做嘅甩尾遙控車，連車身拉花都跟到足。

■屬S15系列嘅日產Silvia，也是甩尾遙控車界嘅熱門車款。

■連尾翼都有酷似碳纖設計，學足真車一樣。

■摩打頂加有風扇，可幫助散熱。