醫管局啲醫生成日超時，當中以合約醫生嘅處境最慘，所以唔少醫生都好鬼憎啲管理層。可能都知道啲員工怨氣重，醫管局主席胡定旭（圖）噚日喺電台，點咗首貓王皮禮士利嘅名曲「LoveMeTender」畀啲員工，仲話「因為我哋真係好愛你哋㗎！」
聽完都真係骨痹，講到鬼死咁作狀，呢啲說話攞嚟𠱁女仔都唔掂，啲員工又點會受呀？如果真係咁愛啲員工，話晒旭哥都係煲呔嘅老友，不如鼓勵吓煲呔唔好驚冇得連任，快啲搞掂醫療融資，減輕吓公營醫療負擔仲實際啦！
旭哥噚日上港台訪問，佢醫管局張約到10月屆滿，如無意外都會繼續冧莊，如果周一嶽下年唔想做局長，話唔定旭哥都係候補人選之一。不過佢就話，自己對從政冇興趣，做醫管局已經夠晒。