台灣歌手王力宏前晚喺紅館舉行首場嘅「王力宏蓋世英雄香港演唱會2006」演唱會，佢喺演唱會入面大騷個人音樂才華，彈琴、彈結他、拉小提琴、拉二胡同打鼓，乜嘢樂器都識，𠱁到在場觀眾如癡如醉，難怪擔任演唱會嘉賓嘅張學友都讚到王力宏天上有地下無，學友話：「王力宏紅係有原因，一係佢靚仔，二係真正靚仔又有才華嘅，喺娛樂圈真係唔係有好多人，王力宏絕對係其中一個，剛才睇到佢又彈琴，又吹嘢，呢啲要天份。」
王力宏同學友兩位都表現得好high，合唱咗《吻別》，其後學友都單獨唱咗首《寂寞的男人》，台下反應非常熱烈。
除咗唱歌同大騷個人音樂才華外，王力宏喺舞台又大跳hiphop，同女舞蹈藝員鬼咁親密，其中有女舞蹈員將王力宏身上嘅白背心扯爛，令佢身上只剩番件黑色開胸皮背心，大露兩點，其後佢安哥時，更表演倒豎蔥，簡直十八般武藝，樣樣皆精。
祖名Fiona拍拖捧場
此外，噚晚舒淇不避嫌捧緋聞男友王力宏場，佢喺晚上八點半戴住賊仔帽同好友馮德倫到場，佢一入場就去VIP位坐低，由於吸引唔少記者圍住影相，遮住佢睇騷視綫，所以最後佢都起咗身邊搖身邊睇騷。房祖名同薛凱琪（Fiona）呢對緋聞男女亦前後腳到場欣賞。
