周星馳最近喺家鄉寧波開拍以外星人為題材嘅新片《長江七號》（暫名），仲會喺佢早前去揀蟀嘅寧波萬里國際學校小學部借場地拍攝。
唔知係咪因為返到家鄉，所以星爺一身打扮比喺香港更加街坊，着住件白底衫同黑波褲四圍走，佢成面鬍鬚，戴住副黑膠框眼鏡，唔識佢嘅肯定唔知佢係明星。噚日下午兩點，星爺離開佢住嘅酒店，上咗部七人車，為咗撇甩追訪嘅記者，司機仲專登喺酒店兜咗兩個圈，最後車咗佢去附近嘅德勝麵館。原來星爺約咗好友谷德昭同喺電影《少林足球》裏飾演豬肉佬嘅演員等，一行四人食午飯。
當眾剔牙
四個大男人食麵嗰陣有傾有講，不時興奮到手舞足蹈，星爺大啖大啖咁食麵，食完仲用牙籤剔牙，好鬼「佬味」。成餐晏大約食咗一粒鐘，之後一行人去咗維多利大酒店，嗰度仲有劇組人員出出入入，唔知係咪星爺食飽飽，靈感到，即刻趕去開工呢？
採訪、攝影：娛樂突發組
