就讀喇沙書院理科班，即將升讀中五嘅李卓霆，7月份就喺第三屆中國東南地區數學奧林匹克比賽中奪得一等獎。呢個係全國性比賽，180名來自唔同國家嘅學生當中，只有20人可以攞到一等獎，佢係奪得呢項殊榮嘅唯一一個香港代表，真係為港爭光。
李卓霆話佢小五開始已經接觸奧數，仲話奧數對佢嘅學習有好大幫助。「學奧數除咗對學數學有幫助之外，仲可以幫助其他科目，例如科學嘅解難方法。」佢仲話，比賽共五小時，要計八條數，其中部分幾何題目都好艱深。為咗準備比賽，佢每日大約操練半個鐘。
年僅11歲，就讀聖芳濟各英文小學嘅陳希淳都好犀利，第一次參加呢個比賽就攞二等獎。佢話最鍾意數學科，仲話數學考試攞A級，證明興趣絕對可以發揮成專長。