一隻馬騮（阿笨）、一隻儍狗（阿占），令近期人氣急升嘅日本動物節目《阿笨與阿占》大收旺場！但講到動物呢一科，原來都係廸士尼強項，今個禮拜，DVD場就剛剛返咗隻廸記卡通片《獸猛猛奇兵》，雖然佢唔係夢工場同Pixar嗰種大卡士製作，不過每一隻動物角色，均擁有獨特嘅思想行為，加插埋超搞鬼CG動作，就算劇本老套咗啲，只要一家大細坐埋睇，睇落都可以好有Heart㗎！
記者：陳國輝
劇情講述動物園裏面嘅獅子王阿森、樹熊阿祖、松鼠寶爺以及長頸鹿B.J.等一班老友，為咗逃離動物園並拯救走失咗嘅小獅子，佢哋喺路上遇到好多有趣兼意想不到嘅事情；當然，故事最終係大團圓收場，但過程中就教識大家團結、親情及友情係非常重要嘅，中心思想夠晒健康，加上有趣3D動畫及廣東話配音，畀小朋友睇就Fit晒！
CG靚到似《Discovery》
無人夠膽彈廸記卡通嘅CG唔得，當然今次都唔會例外！呢次跟以往夢工場或者Pixar嘅合作有啲唔同，《獸》片風格寫實好多，例如獅子說話時嘅五官表情、打交嗰陣嘅激烈動作等，完全無晒廸士尼一向愛誇張嗰隻風格，加埋CG喺MAPING上真實程度相當之高，好似蜥蜴嘅皮膚、森林裏面各種植物嘅皮層等，講得誇張少少，睇完呢隻DVD之後，感覺有啲似睇咗套《Discovery》咁正，如果屋企有部質素靚啲嘅Plasma或者LCDTV，直頭拎去做試機碟都仲得！
另外值得一提，就係《獸》片喺頭5分鐘，曾經用上2D動畫嚟表現。你可能會問，乜唔係全程都用3D咩？原來，開場頭幾分鐘係獅子講緊故事，屬於幻想嗰部份，難怪會有啲唔同，但整體嚟講仍算係有新意。
特別收錄值得一睇
查實DVD包裝僅屬好普通嗰隻！無特別附送手機繩、或公仔等小禮物，但除咗隻DVD，佢仲額外收錄埋Bonus內容，包括「動畫背後的秘密」、「被刪剪片段」以及「音樂特輯」等3個幕後花絮。雖然，有啲係好例牌咁加入去，但仍然有值得一睇嘅部份，就係「刪剪片段」中包含好多原故事都無嘅性格，例如松鼠仔幻想自己變成大隻佬，勇救女朋友一幕，以及大家互相唔信任對方，導致關係幾乎破裂等情節。以電影本身得85分鐘嚟講真係太短，如果唔欣賞埋Bonus「加長版」嗰部份，點都覺得唔值！
除咗「被刪剪片段」內容，有時間仲可以睇埋幕後配音及主題曲兩部份，但又再老實講句，畢竟呢套只係100%小朋友卡通，Bonus只提供英文版嘅幕後配音花絮，完全唔見有廣東話配音員介紹，似乎唔夠全面；而主題曲則由外國女子組合所唱，大部份香港觀眾覺得陌生，又何況小朋友呢！
必睇過癮笑位
雖然大部份情節都講親情，但係廸記肯定會留番啲笑位畀大家欣賞！
