好多人話《死亡筆記》唔睇唔舒服，不過近排有套西片《聯合93》（United93），一樣唔睇唔得，但睇完會令你更加唔舒服。拍過《叛諜追擊2：機密圈套》（TheBourneSupremacy）嘅導演保羅格連加斯（PaulGreengrass），利用拍災難片同紀錄片嘅手法，重現紐約911恐怖襲擊嗰日其中一架墜毀飛機嘅慘劇，情節扣人心弦，雖然冇巨星、冇億萬金元特技助陣，但套片嘅震撼程度絕對唔會差過《明日之後》（TheDayAfterTomorrow）呢類災難大製作。 撰文：戶川淳
當你知道今個月31日喺本地正式上映嘅《聯合93》，係描寫2001年9月11日，美國遭受恐怖襲擊中第四架被劫客機「聯合93」嘅故事之後，坐喺大銀幕前嘅你就要作好心理準備，喺90分鐘嘅空中旅程上眼巴巴睇住無辜嘅乘客、空姐同機長，齊齊步向萬劫不復嘅機毀人亡悲慘結局，正因為呢套片唔係虛構，你唔會見到生機同希望，反而只有恐懼，絕對震撼觀眾內心深處。
仿紀錄片式拍法
導演保羅格連加斯喺拍攝《叛諜追擊2：機密圈套》嗰陣，早已表現出緊湊嘅節奏感，《聯合93》亦拍出令人透唔過氣嘅效果，導演其實有意拍成一齣紀錄片式電影，所以唔會有大明星助陣，仲運用好多手提攝影鏡頭拍攝，營造真實效果。
導演事前做足資料搜集，訪問咗多位身亡乘客同機組人員嘅家屬，每位演員都收到一份佢所扮演嘅死難者檔案，同時部份家屬亦願意幫助演員，甚至有機會畀佢哋聽到死難者臨撞機前喺機上打畀家人嘅電話留言，希望揭露慘劇真相，正如影片結尾打出嘅字幕一樣，導演只係想致以最崇高敬意，紀念機上所有死難者，並唔係要去引起種族或國家仇恨。