電腦J約幾位昔日同事食飯，叫埋左丁山出席。電腦J呢排成日到東莞公幹，為一啲工廠做IT顧問，適逢東莞空氣係整個珠三角區內污染最嚴重嘅，老友披圖梁上網睇到資料，呼籲一眾老友唔好上東莞，以免健康受損，患呼吸系統毛病者，特別要謹慎啲。不過電腦J為咗賺錢，唔去唔得。冇法啦，好幾位客戶都在東莞設廠，香港IT人已經紛紛北上搵工，搵機會，留響中環嘅，仲敢嫌東莞空氣污染，唔上去開工？
電腦J從行內人士聽聞，中文報紙搜尋公司Wiser（慧訊）嘅開國功臣RingoLam已經辭職，另起爐灶，搵到一啲基金與譚偉豪嘅支持，到北京開公司，其商業模式與YouTube大致相同。YouTube兩位創辦人ChadHurley與SteveChen只有二十幾歲，最近喺紐約出席一個廣告商會議，行內人士蜂擁而至，爭相會見呢兩位最新嘅網上英雄。Ringo如果在北京（點解唔在香港創業？）打開局面，怕者都會成為中華英雄。
北上乃IT人大趨勢，內地人多、薪金低，佔盡研究開發（R&D）優勢，正如美國啲大公司將軟件開發外判畀印度公司一樣。最近美國大公司Motorola，將香港嘅廠房基地結束，以後將中國及亞洲嘅製造、設計、開發業務集中於天津、上海、北京，香港只剩番營銷，賣手機業務。大埔工業邨嘅「武得勞喇」工廠曾經係該公司嘅模範工廠，設計出DragonBall晶片，威盡一時。不過今年冇晒咯，員工冇得撈嘞！最近貿發局主席吳光正話香港搞hi-tech有可為，實不知何所見而云然，佢老人家見到乜嘢好條件而我哋睇唔到呀？
小L自中大資訊工程系畢業後就加入Motorola做咗成十幾年，成為中產，都唔知幾爽，突然間變成冇得撈嘞，加入失業大軍，一時之間唔知邊度有人請。不如請小L去同吳光正講吓，TDC會唔會搞晶片開發？