去澳門仲食豬扒包同葡撻？係好味道，不過悶咗啲囉！今日一於帶大家食意大利菜，嫌普通？聽埋先喇，原來澳門意大利餐廳不出5間，Deli係其一，大廚係香港人Ken，隻身走到澳門開意大利餐廳，雖然客仔唔多，但幫襯開嘅熟客個個話正，仲大讚有私房菜風味，點番客秘製凍蟹，包你知道乜嘢叫做濠江美食。
記者：黃若茵
攝影：林栢鈞
模特兒：Katie&Ruby
打單泡過澳門開舖
踏入Deli感覺好寧靜，一來店內裝潢簡單清幽，二來客人唔多。不過客人少唔代表水準差，只係澳門人少食意大利菜咁解啫，老闆兼大廚Ken話：「澳門人傳統菜做得好好，遊客多數選擇食地道葡國菜，澳門嘅餐廳亦唔似香港咁多元化，大部份澳門人都唔會試其他國家嘅菜式。開舖頭半年生意真係好差，曾經諗過唔做，但唔想放棄自己嘅夢想。𠵱家做咗兩年，Keep到唔少熟客，熟客又會帶朋友嚟食，𠵱家雖然唔係晚晚座無虛席，但有班熟客撐場，鍾意食我煮嘅嘢，我一定會做落去。」
心機誠意抵撐
點解唔喺香港開餐廳？「兩年前見澳門好景，而且呢度意大利餐廳唔多，咪過嚟試吓囉。」可惜嚟到澳門先發現唔少難處，「攞貨比香港困難，呢邊意大利食材供應商真係無乜，𠵱家我會返香港攞貨。」有時熟客還會要求佢做餐牌無嘅菜式，就好似一味凍蟹，佢都會照做，保證客人食得開心。臨走，餐廳僅剩一枱客，但見Ken仲喺廚房一腳踢，為客人端上甜品，呢份心機同誠意咪抵撐囉。
1.番茄多士$25
一般做法係切粒蒜茸撒上番茄，但Ken將蒜茸搽喺剛焗完嘅麵包上，除蒜茸香味之餘，咬落茄味勁出。
2.燒羊架$118
用芥末、香草、欖油醃新西蘭羊仔，撒麵包糠焗至半熟。半生熟羊肉鮮嫩多汁，跟麵包糠一齊咬，多層脆口感覺好惹味。
3.凍蟹時價約$150-$200
Ken：「餐牌入面無呢道菜，客人想食就要預訂，我會揀選當日新鮮靚蟹入饌。今日就揀咗呢隻紅蟹，蟹肉好鮮甜㗎！個汁係我自己調配嘅，用咗醋、蒜茸、胡椒同埋紅番椒，點呢個汁可突顯蟹肉鮮味。」
4.意式生牛肉$45
選用新西蘭牛柳，因為較少脂肪，唔似美國牛多脂肪，影響口感。牛肉撒上芝士粉、黑椒及欖油等，入口十分滑嫩香口，連向來怕食生肉嘅我都食唔停口。
5.焗紙包原條多寶魚$220
Ken：「多寶魚屬於比目魚一種，肉質好滑又容易熟。我用白酒同埋欖油焗，焗到啲魚汁出晒嚟，所以個汁好鮮魚味㗎，想食就要早1日預訂喇。」
6.香煎牛仔扒$268
Ken：「我揀荷蘭2至4星期大嘅牛仔，由於仲未發育屬於白肉，會比較健康。細牛啲肉先夠腍，我鍾意煮得生啲，食得出牛味，而且好嫩口。」
食客有Say
一班熟客經常幫襯，仲帶埋私伙靚酒配合Ken做嘅意大利美食。
陳先生
意式生牛肉好正，配紅酒一流，鍾意呢度有私房菜Feel。
Angee
朋友介紹我嚟，平日喺澳門好少食到意大利菜。
搵食攻略
Deli（853-704177）
地址：澳門友誼大馬路711-733N中富大廈H舖
營業時間：12:00nn-10:30pm
座位：60個
人均消費：$120-$150
有着數：澳門國際銀行信用卡普通卡可獲9折，金卡可獲85折
最好賣：生牛肉，日賣20份