慶鈴（1122）挨近近3年低位，殘到不堪，睇位撈底。慶鈴啱啱公布06年度中期（6月止）業績冇耐，純利增長近22%到3233萬銀人仔，但市場冇乜反應，可能仲係嫌汽車股PE好貴（慶鈴往績PE69倍，06年度預期PE42倍）。但要咁睇，祖國汽車業競爭劇烈，加埋原料價貴，慶鈴喺咁惡劣嘅環境下，仲有雙位數增長，難能可貴。加埋慶鈴第二大股東日本五十鈴，又係業界老行尊，集團透過同五十鈴合作經營，避過呢段艱難期，中期睇高一線。
再講，慶鈴NAV2.58港元，現價（1.07元）相對折讓近59%。又集團手頭淨現金高達20億港銀，每股淨現金高達0.8元，係現價74.7%，有咁高淨現金墊底，驚乜？呢期慶鈴再跌，一質穿1蚊，就要撈底。當炒NAV折讓，短線博20%升幅，慶鈴價見1.2元，仲有大把收窄空間，但目標回報，已經有魚有肉。
寰宇有奇景
寰宇（1046）絕對係冷嘢，但對上星期五，有高達6900萬股成交，係過去1年最大成交日，兼且兩邊買賣盤，有講到唔信嘅歐、美資名牌參與，算係奇景。
再睇睇數據，寰宇NAV0.18元，現價（4.5仙）大幅折讓75%。寰宇每股手頭淨現金高達7.8仙，一樣係每股淨現金奇高，呢勻大成交先行，股價若然有異動，嚟轉短打，博十個八個巴仙升幅，問題唔大。
錢雋