落選華姐自然，參選時因為貌似日本女星，一度成為熱門，可惜最終大熱倒灶，佢一度簽咗內地經理人，成為白癡師妹，備受力捧，但佢心頭高又唔爭氣，廣東話唔正又唔肯好好下苦功，結果俾經理人投閒置散，自然於是就識埋啲損友日日夜蒲，關仁近排仲聽聞佢泊咗大碼頭，搭上專包選美出身靚女嘅穀王，所以自然都變成暴發戶，身光頸靚，做咗名牌奴隸。
白癡搵佬慰藉
白癡同大風遮呢排癡纏到好似被萬能膠黐住咁，關仁知道大風遮早幾個月前，因為未同白癡正式表態，所以白癡成日悶悶不樂，經常換畫慰藉，當時佢除咗趁大風遮唔喺香港時，同外籍男友一齊外，仲搭上一名專搞音樂製作嘅幕後才子。雖然人哋已經有個正印女友，但佢依然要做第三者，才子諗住食得唔好嘥，既然有靚女送上門，咁梗係冇所謂啦，咪瞞住女友同白癡玩一排囉。點知有晚才子帶女友同埋成班朋友去銅鑼灣蒲吧時，白癡收到風，竟然唔理三七二十一就單拖殺落酒吧，搞到才子尷尬到幾乎搵窿捐。
猩猩王心虛爆粗
猩猩王早排喺機場出現，畀班等緊大風遮嘅記者見到，即刻上前問佢喺邊度返嚟，點知猩猩王好惡咁用粗口問候記者，事後佢解釋話因為最憎狗仔隊。其實猩猩王當日發老脾係另有原因，關仁有個空姐朋友當日返港時，就喺機場禁區見佢同個女仔一齊，睇嚟係甜蜜外遊返港，個女仔皮膚黝黑，有啲鍾麗緹feel，鬼鬼哋，不過講廣東話同攞住本香港護照，空姐又話覺得佢完全唔靚女，猩猩王一出閘見到記者，身有屎就梗係發惡啦。
Textby關仁