理大個應用科學及紡織學院早前搞嘅迎新營玩幪眼剝衫遊戲爆出醜聞，噚日到佢哋學生會搞迎新營，八方梗要特登去睇吓班未來棟樑仲會點搞法！去到只見500位年輕人分成四組，輪流載歌載舞，情緒極high（圖），各組新生競技之餘，並冇好似中大前日迎新營咁搞到四院互罵貶低「敵組」，反而互相為對方打氣，亦都全無意淫不雅成份，好玩得嚟都幾正經。
學生會會長Ross話，為咗搞呢個三日兩夜嘅「大O」，搞手已聽咗平機會講座，學生事務處又發咗道德指引畀佢哋，今次所有遊戲都經過學生會內部嘅「道德審查」，色情一定唔得，連happycorner都禁玩，務求令新生玩得安全又放心咁話！成啟聰攝