名媛出席社交界活動或大小fashionshow，都會一擲千金裝扮得花枝招展，有些以性感招徠，有些則採用名牌攻勢，吸引傳媒報道。有「另類阿太」稱號的新昌營造主席葉維義太太葉梁美蘭，對時裝極度熱愛，甚至夢想開個人時裝展覽。 撰文：顏英儀
名牌LouisVuitton、Gucci、Chanel等都是城中名媛爭崩頭追捧的大路品牌，不過新昌營造主席葉維義太太葉梁美蘭卻是非一般的阿太，喜歡買較另類及外國新晉品牌，所以好多人都會覺得她是另類阿太，品味自成一格。
逆父母意做買手
訪問當日，葉梁美蘭穿上ThomasWylde秋冬新裝和長靴拍照，可惜夫婿卻不懂得欣賞，她說：「ThomasWylde係我近年喜愛嘅牌子之一，HarveyNichols都有賣，主要玩gothic元素，所以有好多十字架同骷髏頭圖案，不過中國人始終迷信，老公唔係好鍾意我着呢類衫，惟有自己出街或出function先着。」
身為時裝狂熱分子的葉梁美蘭兩度被選為十大傑出衣着人士，品味從小開始培養，她說：「媽咪開婚紗店，我自細就喺靚衫堆中長大。其實我大學主修數學，父母想我做會計師，不過我覺得唔適合，所以決定去紐約讀時裝採購，畢業後就做時裝買手。」
每次去ball葉梁美蘭都會認真準備，她說：「每次去ball之前一日，我會去美容院做facial同埋諗定着乜嘢晚裝，當日會去set頭，然後化妝師上門化妝。我去ball嘅晚裝都唔會超過5萬蚊，會買LV同Chanel等牌子，不過我會mix&match，唔會totallook。時裝係我最大嘅興趣，就好似男人鍾意收藏畫，不過我就收藏靚衫，會當衫係藝術品咁買嚟欣賞。我買靚衫唔係想出風頭，絕對唔會abuse或者將着完啲衫即刻拎去二手店賣。」
最欣賞MarcJacobs
愛儲靚衫的葉梁美蘭原來有一個夢想，她說：「希望將多年來儲嘅靚衫舉行一個costumesexhibition，因為儲落唔少出自名師手筆嘅靚衫，例如早期嘅Mr.Moschino、Mr.YvesSaintLaurent、PacoRabanne同Pucci等。如果我唔能夠完成，就希望我個女可以幫我圓夢，繼承我儲嘅靚衫。」
談到最欣賞的設計師，葉梁美蘭多年來十分崇拜MarcJacobs，她說：「MarcJacobs早喺PerryEllis嘅時候，我已經好欣賞佢嘅設計，到𠵱家佢成為時裝界舉足輕重嘅當紅設計師，貴為LV主帥多年，仍然保留佢原本嘅grunge味。」
品味與眾不同的葉梁美蘭，每年會到不同地方旅行兼搜購新裝，喜歡到處發掘新品牌、新晉設計師，閒時還會研究品牌歷史，鍾情有個人風格的設計師，她說：「我喜歡前衞嘅設計，80年代會追當時剛冒起嘅CommedesGarcons同IsseyMiyake等日本牌子，欣賞佢哋嘅創意；而骷髏骨同十字架等標誌都係我喜歡嘅圖案，所以鍾情新晉品牌Libertine、BuddhistPunk、Number(N)ine同DressCamp等funky品牌。讀大學時喜歡punk同好激嘅打扮，不過，𠵱家已經做咗媽咪同人哋嘅太太，所以衣着要合乎身份，而Balenciaga、Givenchy同Lanvin等都係我一向喜歡嘅牌子。」
乖女老公有微言
除了照顧10歲的女兒外，葉梁美蘭還會與她返學做義工，講故事給小朋友聽。不過女兒卻對母親的衣着有微言，葉梁美蘭說：「佢成日覺得我同其他同學嘅媽咪有啲唔同，唔知點解我着衫好唔同，又比其他媽咪瘦。我同佢解釋每個人都唔同，我同阿女返學都會襯過晒衫先出街，可能比一般媽咪fashion啲，但唔會影響我對佢嘅感情。」
葉梁美蘭不願透露每月花費多少買衫，問到其夫有何看法？她說：「佢有時會投訴我買太多衫，但係買衫係我嘅嗜好，識我第一日已經知我係咁，佢同我相反，唔喜歡fashion，不過佢好尊重我。」
攝影：仇志德、陳志嵐
