近日有立法會議員喺中環被毒打，仲收到恐嚇信，人神共憤，連震雄集團主席蔣震（圖右，左為蔣麗嫦）都開口批評，話呢啲行為只有黑社會先做得出，即使對議員不滿，都絕對唔應該用武力。蔣博士仲封咗傳媒做「無冕皇帝」，即係記者見到唔平等嘅事要多監察、多報道、多批評。有記者就笑笑口話：「咁樣做可能俾人打喎。」蔣博士就話，做得記者就要連被人打都唔可以怕。
首富李嘉誠話會捐三分之一身家做善事，蔣震即刻笑晒口話，16年前已經捐晒全副身家，即近60%震雄股權，成立「蔣震工業慈善基金」，如果捐埋僅有100萬股認股權，恐怕連食飯錢都無。
蔣震話1949年落嚟香港時乜都唔識，惟有去碼頭做咕喱托米，辛辛苦苦先賺得一個幾毫，當時食碗牛腩飯就要六毫子，差唔多係半日人工。證明咗即使生活幾咁艱難，只要不斷努力，都可以捱出頭來。