特區政府噚日一口氣出咗多項委任，當中八方最有興趣梗係馮華健同陳茂波嘅任命。
馮華健嘅任期本來12月先到期，煲呔都費事麻煩，實行跟埋其他9月到期嘅成員一齊出稿，反正由𠵱家到明年，日日都係選舉日，早啲派餅仔，唔使咁難睇。
馮華健再出任廣播事務管理局主席兩年，平哥讚佢過去四年貢獻良多，梗係啦，佢阿哥睇得咁嚴，森美小儀又要醒定啲。八方當初以為政府推出廣管局同電管局合併成通訊局嘅方案，馮公子就此玩完，點知當局收回啲意見書個個真係意見多多，睇怕先合拼後改例嘅如意算盤未必打得響。
至於陳茂波係位會計師，煲呔就益佢做法援局主席，等佢多啲機會曝光，下次選舉可以同譚香文有得撼，當年佢以37票之差飲恨，搞到中聯辦都震驚。至於狄志遠，就挺曾有功，封做法援局新成員，下次識做喇。