湯告魯斯（TomCruise）日前被派拉蒙電影公司「炒魷」，成為全城熱話，靚佬湯近日四處找「大水喉」拯救其事業。其拍檔保娜韋格（PaulaWagner）表示，兩家華爾街私人基金公司已答應夾錢讓他繼續開戲。
湯告魯斯日前被指行為怪異及片酬食水深而被派拉蒙「炒魷」，不少荷李活權力人士認為，過去長達20年的湯告魯斯年代正式告終。而他失去派拉蒙這張長期飯票後，即四處尋找靠山。
靚佬湯跟拍檔保娜經過今次一役後，似乎無意再泊大片廠碼頭，寧願轉移視線尋找其他投資者。「炒魷」事件公布才一天，保娜已成功找到兩家華爾街私人基金公司答應每年向他們的Cruise/Wagner製作公司投資1億美元（約7.8億港元），不過這個數目只及靚佬湯近作《職業特工隊III》（Mission:ImpossibleIII）製作費的三分之二，看來日後靚佬湯真的要慳住使。
科學教傳授吸水法
雖然保娜仍未公布該兩間基金公司的名字，但事情發展得非常快，前日靚佬湯就被目睹帶同未婚妻姬蒂荷姆絲（KatieHolmes），跟一班貌似華爾街大鱷的人士食飯。當日下午，靚佬湯與姬蒂由多位助手及保鑣陪同下，先去到聖芭芭拉一座既殘舊又神秘的大廈，令人懷疑該處是科學教派的分部，未知靚佬湯是否想在飯局前，先徵詢教派高人的意見。
靚佬湯和姬蒂不久步出大廈，還大方向記者揮手。之後他們便返家換衫，再到位於西荷李活的意大利餐廳Orso打點飯局。
是次飯局影響靚佬湯日後「食粥定食飯」，因此他甚為着緊，一早就跟姬蒂到餐廳打點，靚佬湯先跟助手在餐桌附近檢查有沒有可疑物品，姬蒂則跟大廚寒暄，似乎叮囑菜式要做得好好睇睇。未幾，一班身穿名牌西裝的中年男士終於抵達，他們似乎就是約了靚佬湯食飯的華爾街大鱷。
四萬笑容胸有成竹
眾人密會了六小時後離開餐廳，靚佬湯露出其招牌四萬笑容，與賓客逐一握手道別。以靚佬湯一副胸有成竹的表情來看，他這次「大茶飯」已傾成。另外，也有報道指該班中年男士是多間荷李活電影公司的老闆，而之前靚佬湯進入神秘大廈是會見雅虎網站的老闆。